Accessibility links

чәршәмбе, 7 декабрь 2016, Казан вакыты 19:29

Xacdan täsirlär: Britaniä möslimäse


Xacilar öylärenä köçle täsirlär häm xislär belän qayta... Xacda bulıp qaytqan Britaniä möslimäse Arifä Äqbär İndependent gazetında – möselman bulu – säyäsi bilgelänü tügel, dini täcribä dip yazıp çıqtı....

Mäkkä şähärenä kilep töşkäç tä xalıq ağımı mine axşam namazına zur mäçetkä alıp kitte, tirä yaqta tirgä batqan xacilar, berse yanımda London aksentı belän kesä telefonında dustı belän söyläşä, Käğbädä oçraşırbız, inşalla, di... Küpmeder waqıt min tirä yağımdağı keşelärne küzätäm, mine, alarnı, bu London yegeten – Möxämmäd päyğämbärneñ 7nçe ğasırda ütkän yulı buylap säfärgä çığarğa närsä etärgän dip uylanam... "İhram" kiemendä, yağni ike aq cäymä genä yabıp, şul kiemne alıştırmıyça, sabın, teş pastası häm isle maylar qullanmıyça, irlärgä qırınmıyça yulğa çığunıñ säbäbe ni?

Bu borıñğı ğadätlärneñ yäş möselman britannarğa, häm minem kebek ğömerdä dä yawlıq bäylämägän, Britaniädä bäysez tormış alıp barğan keşelärgä ni qatnaşı bar?

Berençe tapqır Qäğbägä barğaç, üzen islam dine möğalime dip tanıtqan ber ir keşe miña – sin yözeñne qaplarğa häm qulıña barmaqça kiärgä tieş, digän ide. Şulay uq minem ğäräp külmägem aña artığı belän ütä kürenmäle bulıp toyılğan ide, häm imeş minem çalbarım astınnan tubıq söyägem kürengän. İslam dinendä Qäğbä yanında xatın-qızlarğa alay qaplanu kiräk sanalmıy, dip äytüem buldı, ul miña nıq açulandı.

Wahhabiçılar ile bulğanğa Söğüd Ğäräpstanğa xacğa kilgän böten xatın-qızlar şundıy möğämälä kürä dip uyladım. Ämma 5 könnän fikeremne üzgärttem. Dönyanıñ 70tän artıq ilennän kilgän möslimälärneñ här berse üzläreneñ milli kiemnären kigän ide. Milli kiemnär tösle matur häm tıynaq ide.

Qäğbä tiräsendä genä xacilar – möselmannar häm möslimälär bergä namaz qıla ala. Anda xatın-qızlar-irlärgä büleneş yuq... Näq Qäğbä tiräsen äylängändä genä min xacnıñ mäğnäsenä töşendem..Keşelär berdäm, aq tänlelär, qara tänlelär, irlär, xatın-qızlar, törle millätlär, illär, törle däräcä keşeläre – barısı da berdäm. Könbatış-Könçığış ta yuq, säyäsät tä yuq....möselmannar soñğı waqıtta islam dinen säyäsiläşterüne küzätä.. Bezgä, yäş möselmannar Könbatıştan bulğan basımğa protest yözennän yawlıq bäyli häm ğäräp kiemnärenä törenä, dip söylilär. Ämma Mäkkädä möselman bulunıñ närsä ikänen añladım. Ul - çitläşü, näfrät häm qarşılıq belderü tügel, möselman bulu ul - ruxi xälät häm ğibädät qılu...

İsemnäre köç qullanu häm şartlawlar belän pıçıratılğan britan möselmannarı öçen öygä şundıy xislär belän qaytu bälki ber dä naçar tügelder....
XS
SM
MD
LG