Accessibility links

Krasnoyarskida tatar tele kursları


Bıyıl cäygä Qazanğa qabat dönyanıñ törle cirlärennän millättäşlärebez cıyılaçaq - Bötendönya tatar kongressınıñ VI Qorıltayına. Biş yılğa ber uza torğan älege çarağa 700 delegat çaqırılaçaq dip belderde tatar kongressı räise Rinat Zakirov jurnalistlar belän oçraşu waqıtında. Çaqırılaçaq delegatlarnıñ 40 protsentı yäşlär bulaçağın äytte ul. Dimäk tağın härwaqıttağıça talaş-suğış kötärgä qala. Törle töbäklärdä tatar oyışması wäkilläre bulıp torğan babaylar, abıylar-apalar alarnıñ äle eş kürsätkäne yuq dip kongressqa donos yazaçaqlar – Qorıltayğa üzlären saylasınnar öçen, yäşlär üz çiratında bezne qartlar yaqın kitermi dip tağın kongressqa zarlanaçaq.

Rinat Zakirov yäşlärgä zur ömetlär bağlawın äytte, şuñadır Mäskäwdä näşer itelüçe “Tatarskie novosti” gäziteneñ tizdän Qazanda quşımtası çığa başlayaçaq. Bu quşımtanı “Molodej'' Tatarstana” gäzitendä eşläwçe yäş jurnalist Aliä Sabirova çığaraçaq di. Bilgele bulğança, Aliä ozaq qına Mäskäwdä dä bu gäzitneñ möxärrire bulıp torğan ide.

Gäzitne çığarırğa xäzer urın da bar. Tatar kongressı räise Rinat Zakirov äytüençä, ul Karl Markstağı Tatar ictimaği üzäge binasın “Qazan” mädäniät üzägenä alğan. Bilgele bulğança, tatar ictimaği üzäge ikegä bülenep, anıñ binası öçen dä zur külämdä burıçlar cıyılğan ide. Şulay uq Tatar ictimaği üzäge binasında Tatar yäşläre Forumı byurosı da utıraçaq di. Bu äle kiläçäkkä küzallanğan eşlär genä.

Ä menä bu könnärdä Tatar kongressı Başqarma komitetı fondınıñ belgeçe İldar Mingäräev Krasnoyarskiğa cıyınuların äytte:

8-11 ğinwar könnärendä Bötendönya tatar kongressı Başqarma komitetı häm Mäğärifne üsterü institutı wäkilläre Krasnoyarskiğa tatar tele uqıtuçılarına kürslar oyıştıru öçen baraçaq. Anda barlığı 45 tatar awılı bar.

İldar Mingäräev äytüençä, alar yıl azağında Mordoviäneñ Tatar Peşläse awılınıñ Şärif Kamal isemendäge tatar mäktäbeneñ 100 yıllığın da uzdırıp qaytqannar. İldar Mingäräev uzğan çaralar turında söyli:

Min Ädäbiät häm sänğät yılı uñayınnan Orenburnıñ Xösäyen Yamaşev isemendäge kitapxanäneñ 100 yıllığında, Çiläbedä Şäyexzada Babiç isemendäge tatar-başqort kitapxanäseneñ 100 häm Mordoviäneñ Ruzaevka rayonı Tatar Peşläse awılı mäktäbeneñ 100 yıllığında buldım. Millättäşlärebez üzläre yäşägän töbäktä üz millätläre öçen ğorurlanıp yäşäp, üzlären kürsätä alğanğa min şatlanıp qayttım.

Bötendönya tatar kongressı Başqarma komitetı fondı belgeçe İldar Mingäräev äytüençä, Tatarstan mäğärif häm fän ministrlığı wäkile bu mäktäpkä däresleklär häm kseroks büläk itkän. Mordoviä yağı isä fizika häm ximiä bülmälären cihazlandıru häm däresleklär alu öçen zur külämdä aqça birelgän.

Landış Xarrasova

XS
SM
MD
LG