Accessibility links

сишәмбе, 6 декабрь 2016, Казан вакыты 17:07

Quşma Ştatlarnıñ Wäkillär Pulatında berençe xatın-qız räis häm berençe möselman kongressmen


İnde xäbär itelgänçä, Amerika Quşma Ştatlarında Kongressnıñ yaña çaqırılışı cıyıldı. Älege waqiğä, anda xäzer yänä demokratlar östenlek itüdän tış tağın şunıñ belän dä qızıqlı - Wäkillär pulatınıñ citäkçese itep tarixta berençe märtäbä xatın-qız saylandı, häm Kongress äğzaları arasında xäzer ber möselman da bar.

"Bu Kongress öçen tarixi ber mizgel, häm bu Amerika xatın-qızları öçen dä tarixi ber waqiğä", di Nancy Pelosi, üzeneñ Kongresstağı Wäkillär pulatınıñ yaña citäkçese itep bilgelänüe uñayınnan.

Üzen şundıy zur urınğa speaker itep saylawnı Pelosi, Kongress äğzalarınıñ şulay itep Amerikanıñ mirası da, ömete bulğan tigezlek idealına tağın da yaqınaytuı dip bäyäli.

Nancy Pelosine saylaw asılda formal'' genä ğämäl buldı, bu inde noyäbr ayında uzğan saylawlardan soñ uq bilgele ide. Yaña speaker demokratlar partiäsennän, xäzerge Kongressta näq menä alar küpçelekne täşkil itä. Şul isäptän yuğarı pulat Senatta da. Prezident Bush şulay itep xäzer üzeneñ 6 yıl prezident bulıp toruı çorında berençe märtäbä, säyäsi köndäşläre östenlek itkän Kongress belän eşlärgä mäcbür bulaçaq.

Ämma Kongresstağı yañalıqlar ber Nancy Pelosi belän çiklänmi. Kongressnıñ başqa äğzaları belän bergä anda pänceşämbe könne Keith Ellison da ant kiterde. Ul şulay uq demokratlar partiäse äğzası häm Wäkillär pulatına Minnesota ştatınnan saylandı. Xalıqqa tuğrı xezmät itü antın yaña kongressmennar ğädättä qulların Bibliägä quyıp birä. Ä menä Ellison antın Qör''än Kärimgä quyıp birde - ul amerikan Kongressına saylanğan berençe möselman.

Şuşı tantana öçen Kongress kitapxanäsendä saqlanğan häm äle 243 yıl elek ingliz telenä tärcemä itelep bastırılğan Qör''änne qullandılar. Ul zamanında Quşma Ştatlarnıñ öçençe prezidentı, ilgä nigez saluçılarnıñ berse Thomas Jeffersonnıqı bulğan. Ellisonnıñ ant kiterü öçen Qör''änne qullanuın qayber konservativ respublikannar kisken tänqitläp çıqtı. Alarnıñ qayberäwläre xätta, Amerikanıñ möxäcirlärne qabul itü säyäsäte qırıslandırılırğa tieş, yuğisä Elliot kebek möselman kongressmennar sanı kiläçäktä tağın da artaçaq, dip belderde.

Äle saylawlarğa qädär radiobızğa Keith Elliot üzeneñ xalıq arasında kiñ abruy qazanuın, keşelärne ayırıp tügel, ä berläşterä alırlıq şiğarlär tabuı belän añlatqan ide:

"Bez üz tiräbezdä kiñ wä törle qatlamnarğa citeşä aldıq, törle tän wä törle din wäkillären berläşterep, alarnıñ barısın da tınıçlıq, sälämätlek saqlaw ölkäsendä uñay ber kön tärtibe tiräsendä tupladıq", dip añlata üz abruyı nigezlären amerikan Kongressınıñ berençe möselman äğzası.

Elliot islam dinen inde üsep citkäç qabul itkän keşe.

"Min katolik ğailäsendä tuıp üstem, di ul, minem äti-änilärem äle dä katolik. Miña 19 yäş tulğaç min universitet torağında möselmannar belän oçraştım. Bez yış qına din turında, Allağa ışanu turında söyläşä idek, annarı alar mine comğa namazına çaqırdı. Anda kürgänem minem küñelemä yattı häm min şunnan birle möselmanmın", di Keith Elliot.

Üzeneñ Kongresstağı eşçänlegen Elliot, ayırmalıqlarğa tügel, kiresençä, bar amerikannarnı berläştergän urtaq sıyfatlar häm qimmätlärgä nigezlänep alıp barırğa cıyına.

Kärim Kamal
XS
SM
MD
LG