Accessibility links

Кайнар хәбәр

Asılğan Säddam Xösäyen mäyete töşerelgän yaña sürätlär päyda buldı


Ğiraqnıñ elekke diktatorı Säddam Xösäyenne cäzalap üterü tiräsendäge ğawğa hiç tınmıy, xörmätle tıñlawçılar. Xäzer inde anıñ asıp üterelgännän soñ mäyete töşerelgän yaña sürätlär barlığı açıqlandı. Bu yulı da alar İnternetta päyda buldı. Şuşı yaña täräqqiät Quşma Ştatlar prezidentı George Bushnıñ Ğiraqta yaña säyäsät turında çığış yasarğa, anda Ğiraqqa östämä ğäskärlär cibärüne iğlan itärgä cıyınğan çaqqa turı kilde.

İnternetqa çıqqan yaña sürätneñ ozınlığı 30 sekund qına çaması, anıñ sıyfatı da ällä ni tügel. Anda xastaxanä arbasına salınğan, käfengä törelgän mäyet töşerelgän, anıñ taplı yözennän märxüm Säddam Xösäyen buluı kürenä. Mäyetneñ başı uñğa awışqan. Videosürättä Xösäyenneñ buğazındağı açıq yarası kürsätelä, artta "Äbü Ali, mina bulış äle" digän tawış işetelä.

Bu, 30-nçı dikäberdä Säddamnı asıp ütergännän soñ dönyağa çıqqan inde öçençe şundıy videosürät. Ğiraq xakimiäte äle haman da, elekke diktatornı asu aldınnan anı törleçä mısqıllawnı töşerep, şul sürätlärne soñraq kiñ cämäğätçelekkä çığaru oçrağın tikşerä.

Monıñ şığıylar tarafınnan eşlänüe häm anda üze sönni ğäräplärdän sanalğan Xösäyenne cäberläwlär, Ğiraqtağı sönnilär arasında köçle näfrät xise uyatqan ide. İnternet bitlärendä kürengän soñğı video da şul näfrätne arttıruğa kiterä ala digän qurqular bar.

Ul arada Quşma Ştatlar prezidentı George Bush üzeneñ Ğiraq öçen yaña strategiäsen bilgelägän häm maqsat itep näq menä Ğiraqtağı wäzğiätne totrıqlandırunı quyğan olı çığışın yasarğa äzerlänä. Ul Qazan waqıtı belän atnakiç tañında yañğırarğa tieş.

Aña qädär äle waqıt bar, ämma inde Aq yort äzerlägän yaña strategiäneñ qayber detalläre turında mäğlümät kürenä dä başladı. Anda, misal öçen, totrıqlandıru eşeneñ töp dilbegäsen Ğiraqnıñ xäzerge xakimiätenä tapşıru, şul maqsatta aña säyäsi, iqtisadi wä iminlek ölkäsendä maqsatlar quyu häm alarnıñ ütäleşenä ireşüne buldıru qaralğan.

Düşämbedä George Bush belän qayber kongressmennar oçraşqan ide, şul söyläşü barışında prezident Ğiraqqa östämä ğäskär cibärü turında süz quzğatqan. Ayırım sannar kiterelmäsä dä, respublikan senatorı Gordon Smith planda ğäskärilär sanın yaqınça 20-läp meñgä arttıru qaralğan dip belderde.

Kongresstağı demokratlar moña kisken qarşı çığa, ä alar anda xäzer küpçelektä. Demokratik senatorlarnıñ berse Barack Obama:

"Min ütkän atnada prezident Bush belän oçraşıp, aña açıqtan-açıq Ğiraqtağı ğäskär sanın arttıruğa qarşı buluımnı citkerdem. Minemçä, östämä 15 yäisä 20 meñ ğäskär Ğiraqta häm Bagdadta bernindi dä üzgäreşkä kiterä almayaçaq. Üzgäreşkä fäqät Ğiraqtağı şığıylar, sönnilär wä kördlärneñ üzara añlaşa aluı ğına kiterä ala", dip belderä demokratik senator Barack Obama.

Amerikan ğäskäriläre sanın arttırunı yaqlawçılar isä, Ğiraqta säyäsi protsess ayaqqa basqançı, anda başta ğisyan beterelergä, köç qullanu tuqtatılırğa tieş digän fikerne alğa sörä. Aq yortnıñ matbuğat wäkile Tom Snow süzlärenä qarağanda, prezident Bush bu mäs''älädä mömkin qädär kiñräk konsensusqa ireşü kiräklegen bik yaxşı añlıy ikän.

Kärim Kamal
XS
SM
MD
LG