Accessibility links

шимбә, 3 декабрь 2016, Казан вакыты 18:51

Omski tatarlarınıñ yaña yıl ömetläre


Yaña yılğa kergändä härkem anıñ uzğan yıldan yaxşıraq buluına ömetlänä, nindider yañalıq kötä, plannar qora. Omskida yäşäwçe tatarlar da yaña yılnıñ uñışlıraq, äybäträk buluına ömet bağlıylar.

Ölkänräk yäştägelär yaña yılnıñ asılda sälämätlek alıp kilüenä ömetlänep, balalarına yaxşı tormış teläsälär, yäşräklär annan uñışlar, baylıq, uñay üzgäreşlär dä kötälär.

Qayberäwlär öçen inde yaña yılnıñ berençe könennän ük tormışnıñ qatlawlana baruı da sizelä başlağan. Yıl başınnan telefonğa, kommunal' toraq xucalığı xezmätenä artqan bäyälär küplärneñ kesälärenä suğaçaq dip sanıy Omskida yäşäwçe Raziä apa Mäcitova. Şulay da bälki pensiäne arttırırlar, eşläwçelärgä xezmät xaqın östärlär. yaña bäyälärgä dä öyränep kitärbez, -di ul.

Yaña yıl başlanğanğa inde atnadan artıq waqıt ütep kitsä dä, anı qarşılawğa bağışlanğan çaralar, çırşı bäyrämnäre äle däwam itä. 9 ğinwar könne “Qızıl Gvardiä” mädäniät sarayında tatar balaları öçen çırşı bäyräme oyıştırıldı. Anda balalar ğädättägeçä Qış babay, Qar qızı belän bergäläp uyennar uynadılar, şiğerlär söylädelär, cırladılar, biedelär.

Bäyräm “Qızıl Gvardiä” mädäniät sarayında ütü säbäple axrı, anda şöğellänüçe “Ömet” törkeme balaları ayıruça aktiv buldılar, kümäk cır başqaruda da ostalıqların kürsättelär.

“Ömet” törkemenä yörüçe balalar biredä cır-biyu belän şöğellänüdän tış, berniqädär tuğan tellären dä öyränälär. Tatar telen alarğa pensiädäge uqıtuçı Nuriä apa Kuçukova öyrätä. Şunsı da üzençälekle – tuğan tel däreslärenä balalarnıñ äti-äniläre dä yöri. “Töp maqsatım – balalar 6 tatar xärefen belsennär, isem-familiälären yaza belsennär, isänläşä, sawbullaşa alsınnar,”- di uqıtuçı Nuriä apa.

Rozaliä Sayganova, Omski

XS
SM
MD
LG