Accessibility links

чәршәмбе, 7 декабрь 2016, Казан вакыты 17:41

Atlas Ğafiyatov: Tatarstanda taqım uyınnarın ğına tügel, başqa sport törlären dä üsterergä kiräk


Uzğan yılğa näticälär yasaw, tege yäki bu tarmaqta urınnar bilgeläw däwam itä yaña yıl başında da. Menä şuşı könnärdä genä tağı ber ölkädä Rusiä töbäkläre arasında reyting iğlan itelde. Anı Rusiäneñ sport buyınça federal’ agentlığı tözegän. Şuña da inde, älege reytingta töbäklärneñ sport ölkäsendäge qazanışları xisaplanğan. Rusiäneñ sport buyınça federal’ agentlığı belgeçläre tözegän reyting tege yäki bu ölkädäge sportçılarnıñ törle yarışlarda çığış yasaw näticäläre nigezendä yasalğan. Şulay uq anda Rusiädä ütkän 2006 yılda massaküläm sportnı oyıştıru häm xalıqnı sälämätländerü eşçänlege bäygese yomğaqları da iskä alınğan. Älege bäygeneñ maqsatı – töbäklärneñ sport üseşen tizlätü, urında balalar häm yäşlär sportın üsterü, xalıqnı sälämätländerü, sport tarmağındağı qazanışlar belän tanıştıru, dilär agentlıqnıñ belgeçläre.

Rusiä töbäkläre älege maqsatlarnı niçek başqardı soñ? Älbättä inde, berençe urınnı Mäskäw yawlağan. Ul 10 meñgä yaqın ball cıyğan. İkençe urında toruçı Sankt-Peterburg şähäre alğan ballar 3 märtäbägä diärlek azraq. Öçençe urınnı bu reytingta Mäskäw ölkäse bili. Tatarstan da 81 töbäk arasında töşep qalğannardan tügel. Ul bu isemlektä 14 urında tora. Äytergä kiräk, kürşelärebez Başqortstan respublikası Tatarstannan östäräk, 11 urında urnaşqan. Nigä soñ üzeneñ Aq bars, Rubin, UNİKS häm başqa küp kenä Rusiä berençeleklärendä şaqtıy uñışlı çığış yasawçı komandaları, sportçıları belän bilgele respublika reytingnıñ berençe 10 ğına kerä almağan? Älege soraw belän bez küp yıllar sport temasına yazuçı jurnalist, Tatarstan yäşläre gäciteneñ baş möxärrire urınbasarı Atlas Ğafiyatovqa möräcäğät ittek.

Älege reytingnı tözegändä töbäktäge sportçılarnıñ dönya küläm yarışlarda çığış yasawınnan da çığıp bilgelände. Bu yaqtan qarağanda, bez çınnan da kürşelärdän qalışabız. Mäsälän, uzğan qışqı olimpiä uyınnarında Başqortstannan 9 sportçı qatnaştı. Ä bezdän – beräw dä yuq. Cäyge olimpiä uyınnarı belän dä şul uq xäl. Soñğı uyınnarında bezgä mäsälän ber medal’ qayttı, ä menä Mordoviä sportçıları 3 medal’ yawladı. Tatarstanda komanda uyınnarına zur iğtibar birälär. Aları da kiräk inde anısı, läkin alay uq küp komandalar totarğa kiräkmäs ide. Alarğa kitkän aqçalarnıñ ber öleşen kübräk xalıqnı cälep itkän sport törlärenä, olimpiä törlärenä totarğa kiräk

Atlas Ğafiyatov fikerençä, bügenge köndä Tatarstanda massaküläm sportqa, yäşlärne, balalarnı sportqa cälep itügä iğtibarnı kübräk birergä kiräk. Küp yıllar sport temasına yazuçı jurnalist sport, fizik künegülär belän xalıq, bigräk tä yäşlär, kübräk şöğellängän sayın, tatarstannıñ şuşındıy reytinglarda näticäläre tağı da yuğarıraq bulaçaq, dip sanıy.

Gölnaz İlgizär

XS
SM
MD
LG