Accessibility links

пәнҗешәмбе, 8 декабрь 2016, Казан вакыты 15:02

2007 yılnıñ istälekle könnär kalendare çıqtı


1950 yıllarnıñ axırınnan uq kilgän ber traditsiäne däwam itterep Tatarstan respublikasınıñ milli kitapxanäse, häm anıñ “Milli kitap” dip atalğan üz näşriäte 2007 yıl öçen “İstälekle häm onıtılmas datalar kalendare”n xäzerläp bastırıp çığardı. Kalendar'gä kertelgän istälekle datalar Tatarstannıñ ictimaği, säyäsi, xucalıq, mädäni tormışındağı töp waqiğalarnı häm faktlarnı şulay uq kürenekle şäxeslärneñ – yazuçılarnıñ, fän mäğärif, mädäniät häm sänğät eşlekleläreneñ-yubileyların çağıldıra.

Yıl sayın çığa torğan bu kalendar' kitapxanäçelärgä , muzey, radio häm televidenie, matbuğat xezmätkärlärenä, uqıtuçılarğa, tuğan yaqnı öyränüçelärgä yärdämlek bularaq täqdim itelä. Bu kalendar' belän faydalanu öçen tatar häm rus tellärendä beleşmä tekstlar, bibliografik ädäbiät isemlekläre birelä. Ul älegä 100 genä danä tiraj belän çıqsa da, anıñ abruyı yıldan yıl arta bara, kalendar'ne sorap kilüçelär sanı kübäyä.

Bıyılğı yılnıñ kalendare närsägä bağışlanğan , nindi waqiğalar belän bäyle buluı turında Milli Kitapxanä direktor urınbasarı İrek Hadiov menä närsälär dide

“ Kalendar'ne Alabuğa şähäreneñ meñ yıllığına bağışlanğan säxifä açıp cibärä. Annarı kürenekle şäxeslärneñ yubileyları turında mäğlümatlar urın alğan. Alar arasında 2007 yılda yubileyların bilgeläp ütüçe däwlät eşlekleläre, ädäbiätıbızda milli tormışıbızda tirän ez qaldırğan yazuçılar Ğalimcan İbrahimov, Mirsäy Ämir, İbrahim Ğazi, Kärim Tinçurin; ğalimnärdän: Ğaziz Ğobäydullin, Ğazi Kaşşaf, Vasiliy Radlov, Vasiliy Bogoroditskiy, Yevgeniy Zavoyskiy, Camal Walidi; säxnä ostalarınnan: Gölsem Söläymanova, Gay Tahirov, Rinat Yeniki; din eşlekleläre Ğalimcan Barudi, kollleksioner Andrey Lixaçev yubileyları uñayı belän şaqtıy mäğlümatlar urnaştırılğan.

Şäxeslärneñ yubileylarınnan başqa tağın nindi zur istälekle häm onıtılmas waqiğalarnıñ yubiley dataları kertelgän digän sorawğa İrek Hadiev bolay dide.

Berençe törki-tatar basma kitabına 285 yıl, “Ğ. Tuqay isemendäge Tatar Däwlät filarmoniäsenä 70 yıl häm 200 gä yaqın yubiley dataları turında qısqa-qısqa mäğlümatlar birelä”,- dide ul.

Bu kalendar'ne üzläre oyışmasında buldırırğa teläwçe ber xezmätkärneñ fikere menä niçek.

“Bu kalendar' ägärdä satuda bulsa, bik küplär şul isäptän mindä bik teläp satıp alğan bulır idem”.

Bu “İstälekle häm onıtılmas datalar kalendare” oyışmalarğa buşqa taratıla.Ämma anıñ tirajı bik az bulu säbäple, kalendar' küp kenä mäğärif, mädäniät, matbuğat oyışmalarında eşläwçe cawaplı xezmätkärlärgä barıp ta citmi ikän. Bu kalendar'ne tirajı kübräk bulsa, satıp alırğa teläwçelär dä bar ikän.

Şulay uq bu “Milli kitap” näşriätında “İsän yäşi tirän tamırlar...” dip atalğan metodik bibliografik yärdämlek bastırılıp çığarılğan. Ul kürenekle yazuçı, ğalim, däwlät eşleklese, xalıqqa bay ädäbi häm fänni miras qaldırğan tatar ädipläreneñ berse Ğalimcan İbrahimovqa bağışlanğan. Çönki 2007 yılnıñ 12 martında anıñ tuuına da 120 yıl tula. 30 yıllıq icat ğömerendä ul yegermeläp xikäyä, öç povest', dürt roman, ber p'yesa, ayırım kitaplar bulıp çıqqan unike fänni xezmät, biş yözgä yaqın tänqidi häm publitsistik mäqälä, tel ädäbiät buyınça, unnan artıq däreslek bastırıp çığarğan.

Anıñ “Almaçuar” xikäyäse , “Qızıl çäçäklär” poveste, “Yaña keşelär” draması, “Tatar xatını nilär kürmi”, “Qazaq qızı”, “Tirän tamırlar” kebek romannarı başqa- rus, başqort, qırğız, azerbaycan, qazax, yaqut xalıqlarında da kiñ tanılğan.

Tatarstannıñ Milli kitapxänäse näşriätında bıyıl Ğalimcan İbrahimovnıñ 120 yıllıq yubileyına bağışlap nindi büläk äzerläwläre turında İrek Hadiov bolay dide

Ğalimcan İbrahimov-ul millätebez öçen, tatar xalqı öçen iñ qaderle, zur, böyek ädiplärebezneñ berse. Anı bezneñ respublikabıznıñ mäğärif, mädäniät oyışmalarında, kitapxanälärdä şuşı yubileynı bik zurlap bäyräm itärgä ide. Kitapxanäbezneñ fänni- metodik bülege xezmätkärläre anıñ yubileyına bağışlap, maxsus metodik ber yärdämlek bastırıp çığardılar.Bu yubiley 2007 yılda ütkäreläçäk yubileylarnıñ ber matur bizäge bulıp zurlap bäyräm iteler dip uylıybız”,- dide TR Milli kitapxanä direktor urınbasarı İrek Hadiov.

Mälikä Basıyr

XS
SM
MD
LG