Accessibility links

пәнҗешәмбе, 8 декабрь 2016, Казан вакыты 05:22

41 yäşlek uyğır Kärim Masimov Qazaxstannıñ yaña premier ministrı buldı


Çärşämbedä Qazaxstannıñ yaña premier ministrı bilgele buldı. Prezident Nursoltan Nazarbaev xökümätneñ yaña citäkçese itep Kärim Masimovnı täqdim ite. Parlament bu täqdimne küpçelek tawış belän rasladı.

Prezident Nazarbaev täqdimen raslaw öçen Qazaxstan parlamentına berniçä minut waqıt citte. İlneñ yaña premier ministrı itep bilgelängän Kärim Masimov üzeneñ çığışında prezidentqa räxmäten wä tuğrılılığın belderde:

"Tağın ber närsä äytäsem kilä, monı bügen, xäzer äytergä kiräk dip sanıym. Nursoltan Abişeviç, zamanında sez mine üzegezneñ yärdämçe itep, zur ışanıç kürsätkän idegez. Şunı äytäsem kilä: min sezneñ tuğrı yärdämçegez buldım häm şulay bulıq qalaçaqmın da" di Qazaxstannıñ yaña premier ministrı.

Çığışı belän uyğır 41 yäşlek Kärim Masimov Qazaxstannıñ, bäysezlek yawlağannan birle, 7nçe premier ministrı buldı. Mäğlümät çaraları anı iñ belemle premier dip atıy. Qazax, urıs tellärennän tış, ul ingliz, qıtay häm ğäräp tellärendä söyläşä, iqtisad fännäre doktorı. Zamanında transport häm elemtä ministrı bulğan, ike bank citäklägän, soñğı wazifası – Qazaxstannıñ iqtisadi üseşe öçen cawaplı vitse premier.

Küzätüçelär fikerençä, anıñ urıs, ingliz häm qıtay tellärendä irken söyläşüe Qazaxstannıñ 3 töp iqtisadi partnerı – Rusiä, Qıtay häm Quşma Ştatlar belän xezmättäşlekne köçäytegä yärdäm itäçäk.

Kärim Masimov xärbi xezmättän soñ Mäskäwdä Xalıqlar duslığı universitetında uqığan, soñnan uquın Qıtayda Pekin häm Uxan universitetlarında däwam itkän. 1991 yılda SSSRnıñ Qıtaydağı säwdä wäkillegendä eşläp ölgergän. Sovetlar Berlege cimerelgäç Qazaxstanğa qaytan, törle wazifalarda eşlägän. 2003 yılda Nazarbaevnıñ kiñäşçese itep bilgelängän. İlneñ soñğı waqıtta iqtisadi üseşen beräwlär anıñ tırışlığı belän añlata, başqalar – yuğarı neft bäyäläre belän.

Prezident Nazarbaev parlamentta yasağan çığışında üzeneñ qararın xökümätkä yaña buın belgeçlär cälep itü dip añlattı:

"Berençe näübättä citäkçelektä däwamlılıq, yaña belgeçlär, yaña därman, belem kiräk. Xökümätne alıştırunıñ säbäbe – xäkümätkä yaña buın citäkçelelär cälep itü" di Qazaxstan prezidentı.

Üzeneñ bu çığışında Nazarbaev aldağı yıllarğa berniçä maqsat quydı, Qazaxstannı dönyanıñ iqtisadları alğa kitkän 50 ile arasına kertü telägen qabatladı. Başqa maqsatlar arasında – Dönya Säwdä Oyışmasına kerü, 2009 yılda Yewropada İminlek häm Xezmättäşlek Oyışmasında räislek itü, 2018 yılda qışqı Olimpiä uyınnarın qabul itü.

Elekke premier 52 yäşlek Danial Äxmätov xökümätne iñ ozaq waqıt citäklägän keşe buldı, bu wazifadan ul kötmägändä düşämbedä kitte. Kitü säbäpläre turında tögäl mäğlümät yuq. Qayber analitiklar, Nazarbaev anıñ aqça sarıf itüe häm korrupsiägä qarşı köräşü tırışlığı belän qänäğät bulmağan, di. Alay da, Äxmätov xökümättän bötenläy kitmi, ul Saqlanu ministrı bulıp qalaçaq.

Ali Ğilmi
XS
SM
MD
LG