Accessibility links

җомга, 9 декабрь 2016, Казан вакыты 07:09

Uqıtu sistemasında rişwätçelek


Student, birde, uqıtuçı aldı. Kem äytmeşli, bürelär dä tuq, sarıqlar da isän. Bügen, uqıtu ölkäsendä küp kenä eşlär “aldım birdem” prinsibı buyınça başqarıla. Bu hiç kenä dä, borınğı traditsiälärebezdän sanalğan, qız belän yegetneñ büläk alışuı tügel. Ä uqıtuçı belän uquçı arasındağı bilgele ber kileşü. Tik menä alış bireşneñ obyektı küp oçraqta belem tügel, ä aqça bulıp çığa.

Sessiä citü belän, mondıy alış bireş oçraqları yışaya. Bıltır, matbuğat, radio, televidenie çañ suğıp, Awıl xucalığ, Qazan däwlät texnologiä universitetı ğalimnäreneñ rişwät aluı turında söyläde.

Studentlarnıñ bu qışqı sessiäse tınıç ütärgä oşağan ide. Läkin yuq, bıyıl da rişwät oçrağı açıqlandı. Tik uzğan yıllar belän çağıştırğanda, ul başqaçaraq. Bu yulı alış bireş, Tatar gumanitar pedagogiä universitetında açıqlandı.

Tatar mäğlümat çaraları xäbär itülärenä qarağanda älege uqu yortında tatar balalar ädäbiät kursın uqıtqan ğalimä, studentlardan 5000 meñ sum alğan. Uqıtuçı alğanmı, studentlar birgänme, monısın tieşle orğannar açılar. Bez isä başqa närsägä iğtibar itik.

Tatar balalar ädäbiäte kursı buyınça Filologiä fännäre kandidatı Säwiä Savitova äzerlängän däreslek bar. Monda balalar ädäbiäte klassikları sanalğan ğabdulla Tuqay, Därdmänd, Musa Cälil, Şäwkät Galiev, Robert Miñnullin, Bikä Räximova häm başqa tanılğan şağirlärneñ icatı belän tanışırğa bula. Şularnıñ qayberlärennän özeklär tıñlap ütik. Bu yullarnı kem genä belmi ikän.

Äydä, Aqbay! öyrän sin, art ayağıñ belän tor;

Awma, awma! tup-turı tor, töz utır, yaxşı utır!

İrenä ul uqırğa

İrenä ul eşlärgä

İrensä dä barıber

Turı kilä üsärgä.

Bezneñ Ğäli bigräk tatu käcä belän,

Menä käcä qarap tora täräzädän,

Ğali anı çiräm belän qunaq itä,

Käcä räxmät uqı: saqalın selketä

Menä şuşı şiğerlärne öyränergä telämiçä, studentlar, imtixannı satıp alırğa tırışqan.

Ğalimnär fikerençä ägär uquçılar, çit il ädäbiäten, çit il tarixın tapşıra almıyça aqça tüläsälär ber xäl bulır ide. Ä inde, bişektän, mäktäp partalarınnan tıñlap üskän şiğerlärne belmiçä, şuşı ädäbiätne da satıp alalar ikän. Bu tübängä töşü. Anı aqça cıyılıp, rişwätlär birep tapşırırğa tügel. Monıñ öçen beraz ğına kitap uqu da citä.

Belem qoyısın qazıybız dip, yuğarı uqu yortına kergän, Studentlar isä tatar şiğerlären xäterlilärme? Ni öçen alar balalar ädäbiäten öyränmiçä satıp alunı qulay kürä?

Beläsezme aqça tüläp ciñelräk bit, waqıt ta äräm itmiseñ, aqçasın tüliseñ dä, küñelen tınıç. Ul waqıtında min belä idem inde ul ädäbiätne, nişläp belmäskä, mäktäptä öyrängän bit.

Älegä Qazan däwlät gumanitar pedagogiä universitetında tatar ädäbiäte uqıtuçısınıñ rişwät alu oçrağı tikşerelä. Anıñ näticäläre turında aldağı tapşırularda xäbär itärbez.

Ğädel Galämetdinov

XS
SM
MD
LG