Accessibility links

якшәмбе, 4 декабрь 2016, Казан вакыты 11:23

Prokuratura hönäri bäyrämen bilgeli


Rusiädä prokuraturasınıñ tarixı 1722 yılnıñ 12 ğinwarınnan başlanıp kitä. Näq menä şuşı könne Petr I Senat qarşında general-prokuror wazifası raslanğan. Berençe prokuror itep Pavel Yagijinskiy sanala. Rusiä federatsiäsendä prokuratura xezmätkärläre köne 1996 yıldan birle bilgeläp ütelä. Älege bäyräm Boris Yel’tsin qararı nigezendä kertelde. Bäyrämne Tatarstan prokuraturası da bilgeläp ütä. Respublika prokuraturası Rusiä häm Tatarstannıñ konstitutsiäse, federal’ häm respublika qanunnarınıñ ütäleşen tikşerep tora, tikşerü eşlären alıp bara. Uzğan yılda prokuratura tarafınnan şaqtıy eşlänelgän. Bu xaqta bäyräm uñayınnan dönya kürgän respublika prokurorı Kafil’ Ämirovnıñ qotlawında äytelä. Mäsälän, 2006 yılda respublikada iñ awır cinayätlärneñ berse bulğan üterü oçraqları kimegän. Şul oçraqlarnıñ 90 protsentı inde tikşerelep, cinayätçelär dä açıqlanğan. Rusiädä bu iñ yuğarı kürsätkeçlärneñ berse, dip yaza Kafil Ämirov. Şulay uq anıñ süzlärenä qarağanda, respublika prokuraturası keşe xoquqların yaqlaw buyınça da şaqtıy eşli. Prokuratura eşçänlegeneñ tağın ber ähämiätle yünäleşe – oyışqan cinayätçelek belän köräşü. Bilgele bulğança, bu yünäleştä dä tatarstan xoquqçıları bik näticäle eşläde. Uzğan yılda respublikada Tahiryançılar, 29 kompleks oyışqan cinayätcel törkemnäre östendä zur yañğıraş tapqan mäxkämä eşläre ütte.

Menä şundıy näticäle eşlägän Tatarstannıñ prokuraturası xezmätkärläre bıyıl prokuraturanıñ zur yubiley uñayınnan niçek bäyräm itäçäk? Bu xaqta bez respublika prokuraturasınıñ matbuğat üzäge citäkçese Rufiä Xämidullinadan soraştıq.

Bezneñ hönäri bäyräm 12 ğinwarda bulsa da, bez anı düşämbe könne genä bilgeläp ütäçäkbez. Çönki bezneñ qayber kollegalar prokuratura yubileyı uñayınnan Mäskäwdä ütä torğan çaralarda qatnaşa. Bezneñ tantanalar alar qaytqaç uzaçaq

Prokuraturanıñ hönäri bäyräme aldınnan, ber qızıqlı xäbär dä citkerelde. Xäzer Qazannıñ yañadan üz prokuraturası bulaçaq. Bilgele bulğança, ul 4 yıl elek beterelgän ide. Anıñ wazifaların respublika prokuraturası başqarıp kilgän ide. 10 fevral’dän başlap isä 31 prokuror xezmätkäre Qazannıñ xakimiäte, eçke eşlär organnarın tikşerep, xoquq saqlaw oyışmalarınıñ eşçänlegen tärtipkä salıp toraçaq. Qazannıñ prokurorı bulıp Çallı prokuraturasın citäkläwçe İldus Nafikov bilgelänäçäk, digän mäğlümätlär bar.

Prokuratura xezmätkärläreneñ hönäri bäyräme uñayınnan Tatarstannıñ prokurorı turında da äytep kitmiçä bulmıy. Kafil Ämirov şaqtıy üzençälekle häm qızıqlı şäxes. Xäzer anıñ turında Tatarstannıñ häm Rusiäneñ atqazanğan mädäniät xezmätkäre Roza Cabbarova fikerläre belän tanışığız.

Kafil Ämirov bik küpqırlı häm sälätle şäxes. Ul prokuror ğına tügel, sänğät belgeçe dä, anı teatr, muzeylarda bik yış kürergä bula. Rus telendä belem aluğa da qaramastan, tatar mädäniäte, sänğäte belän bik yaxşı tanış ul. Monnan tış, Kafil Ämirov kitaplar da yaza. Anıñ Qazanğa bağışlanğan xezmäte, yuridik terminnarnı tatarçağa tärcemä itüçe süzlege dönya kürde. Küptän tügel ul töşergän fotolardan torğan kürgäzmä oyıştırıldı. Andağı eşlärne belgeçlär bik yuğarı bäyäläde. Ğomumän, ul qaysı yünäleştä genä eşlämäsen, ul barısın da bik yuğarı däräcädä başqara

Menä şundıy keşe citäkli comğa könne hönäri bäyrämen bilgeläp ütüçe Tatarstan prokuraturasın.

Gölnaz İlgizär

XS
SM
MD
LG