Accessibility links

якшәмбе, 4 декабрь 2016, Казан вакыты 13:23

Tatar ictimaği üzäge qorıltayı ütäçäk


Comğa könne Ufada Başqortstan Tatar ictimaği üzäge idäräseneñ bıyılğı berençe utırışı ütte. Anıñ kön tärtibenä töp tema itep Tatar ictimaği üzägeneñ çirattan tış qorıltayın ütkärü mäsäläse kertelgän ide. Utırışnı Başqortstan Tatar ictimaği üzäge räise Ayrat Ğiniätullin açtı häm alıp bardı. “Başqortstan Tatar ictimaği üzägeneñ çirattan tış qorıltayın ütkärü xaqında uzğan yıl azağında uq kileşkän idek, - dide Ayrat äfände. – Äle aña nıqlı äzerlek alıp barıla. Bar närsä dä aldan uylanğança barsa, bu cıyınnı şuşı ğinwar ayı azağında uq ütkärergä isäp totıla”.

Başqortstan Tatar ictimaği üzägeneñ bu qorıltayın ni öçen “çirattan tış qorıltay” dip atarğa bulğannar soñ? Monıñ säbäbe ğadi genä ikän – Tatar ictimaği üzägenä aşığıç räweştä yañadan räsmi terkälü ütärgä kiräk. Monı Ayrat Ğiniätullin Başqortstan Tatar ictimaği üzägenä qarata ber yıl çaması däwam itkän mäxkämä eşläre häm anı yabarğa tırışu omtılışları belän añlata.

Şulay itep ğinwar azağında Başqortstan Tatar ictimaği üzägeneñ çirattan tış qorıltayı ütäçäk häm anda yaña ustav belän başqa dokumentlar qabul iteläçäk. Şulay uq ağımdağı burıçlar bilgelänäçäk.

Äle Ufada ictimaği üzäk idäräse äğzalarınıñ şuşı qorıltayğa äzerlekkä bağışlanğan utırışında bu cıyında çığış yasawçılarnıñ isemlege tözelde häm anda berençe çiratta nindi problemalar kütäreläçäge anıqlandı. Moña qädär Başqortstannıñ tatar cämäğätçelek oyışmalarına nindi dä bulsa cıyın ütkärü öçen bina yäki zal alu bik qıyın xäl itelä ide. Respublika xakimiätläre bu yulı da älege cıyınnı ütkärügä qomaçawlıq itärgä tırışaçaq dip belderä tatar milli xäräkäte wäkilläre. Şulay da bu çeterekle xäldän çığu cayın tabuğa ömetlänä Tatar ictimaği üzäge idäräse äğzaları.

Fänis Fätxi, Ufa

XS
SM
MD
LG