Accessibility links

сишәмбе, 6 декабрь 2016, Казан вакыты 08:52

İrannıñ Ğiraqtağı wäkillegendä tentülär ütte, Rice Tähranğa kisätü yasadı


Quşma Ştatlar däwlät sekretare Codoleezza Rice, ägär İran Washingtonnıñ Ğiraqta totrıqlılıq urnaştıru tırışlığına ayaq çalırğa mataşsa, Quşma Ştatlar qul quşırıp utırmayaçaq, dip kisätte. Atnakiçtä amerikan xärbiläre Ğiraqnıñ İrbil qalasında İran wäkillegendä tentü ütkärgän, 6 keşe totqarlanğan, sanaqlar, dokumentlar alınğan.

Quşma Ştatlar İrannıñ Ğiraqtağı ğämällären 4 küz belän küzätep bara häm çaralar kürä. Amerikan räsmiläre äytüençä, Ğiraqnıñ tönyağındağı körd töbägendä, İrbil qalasında totqarlanğan iranlılar Ğiraqqa qarşı eşçänlektä şiklänelä. Quşma Ştatlarnıñ Ğiraqtağı ilçese Zalmay Xälilzad bu keşelärdän soraw alındı dide, läkin östämä mäğlmät birmäde.

Ğiraqnıñ tışqı eşlär ministrı Xöşiär Zebari süzlärençä, bu iranlılar Ğiraqta räsmi röxsät belän eşlägän, läkin İrbildäge wäkillek konsullıq tügel, anıñ diplomatik statusı yuq.

İran keşeläreneñ totqarlanuına räsmi Tähran da, Ğiraqtağı cirle körd xökümäte dä tänqit belderde. Ğiraq kördläreneñ kübeseneñ, şul isäptän prezident Cäläl Talabaninıñ da, amerikan ğäskärläre basıp kergänçe, İran belän tığız elemtädä torğanı mäğlüm.

İrbil jurnalistı Qawi Fatah Farda radiosına äytüençä, cirle räsmilärgä bu tentülär turında aldan berni xäbär itelmägän, näticädä körd räsmiläre belän amerikan xärbiläre arasında kierenkelek tuğan:

"Ğiraq Kördstanı xökümäte äytünçä, alar bu xäl turında berni belmägän. İkençe yaqtan, Amerikan xärbiläre totqarlanğan keşelärne İrbil hawa alanınnan bilgesez urınğa alıp kitergä cıyınğanda, Körd iminlek köçläre moña qarşı çıqqan" di Qawi Fatah.

Totqarlanğan iranlılarnıñ xäzer qayda ikäne bilgesez. Atnakiç könne Quşma Ştatlar däwlät sekretare Codoleezza Rice Ğiraqnı totrıqsızlandıruğa yul quyılmayaçaq dip belderde:

"İran xökümäte, üze äytüençä, töbäkne totrıqlı itüdä yärdäm itergä teläsä, ul Liban, Fälästin, Ğiraqtağı ğonaxsız keşelärneñ xıyalların cimerüçe esktremistlarnı xuplawdan tuqtarğa tieş. Häm dä atom qoralın buldıru niätennän baş tartırğa tieş" di Quşma Ştatlarnıñ däwlät sekretare.

Uzğan ay axırında da amerikan xärbiläre Ğiraqta kimendä ike iranlını totqarlağan ide. Tağın ikesen, diplomatik qağılğısızlıqları bulğanğa, irekkä cibärde.

Küptän tügel Quşma Ştatlarnıñ berläşterelgän ştab başlığı general Peter Pace, iranlılar Ğiratqağı wazğiätne qızdırıp tora, İran-taraflı törkemnärne qoral belän täemin itä dip belderde.

İrannıñ tışqı eşlär ministrlığı Ğiraq belän Şveytsariäneñ Tährandağı ilçelären çaqırtıp, soñğı xälgä añlatma birergä soradı. Quşma Ştatlarnı İranda Şveytsariä wäkillek itä. Anıñ üzeneñ İranda ilçelege yuq.

Ali Ğilmi
XS
SM
MD
LG