Accessibility links

җомга, 2 декабрь 2016, Казан вакыты 21:04

Nazıym Xikmätneñ äyberläre Udmurtiädä


15 ğinwar'dä törki dönyasında tanılğan şağir Nazıym Xikmätneñ tuğan köne. Şağirneñ 105 yıllığın Udmurtiä respublikanıñ Votkinskiy şähärendä zurlar bilgeläp üttelär. Votkinskiy şähär muzeyında Nazıym Xikmätkä bağışlanğan şağirneñ äyberlärennän yaña kürgäzmä dä açıldı. Qoyaşlı Törkiäne Udmurtiä respublikasınıñ Votkinskiy qalasın närsä berläşterä, ni säbäple bu şähär muzeyında Nazıym Xikmätkä bağışlanğan kürgäzmä eşli başlağan digän sorawlar urınlı, älbättä. Moña añlatma bik ğadi.

Votkinskiy qalasında tuıp üsep, biredä urta mäktäpne tämamlağan, küp yıllar Mäskäwdä ğömer itkän Galina Kolesnikova, törki dönyasında tanılğan şağir Nazıym Xikmätneñ tormış iptäşe, bügen qabat biredä yäşi.

Galina xanım Nazıym Xikmätne däwalawçı, şağirneñ şoferı, särkätibe häm yaratqan xatını. Galina Kolesnikova Votkinskiyda urta mäktäpne tämamlap, Perm şähärendä meditsina institutında, tabip hönärenä iä bulğan, ul - suğış veteranı.

Suğıştan soñ Mäskäwdä ordenatura tämamlıy, yartı ğasır Mäskäw şifaxanälärendä eşli. Galina Kolesnikovanıñ 20 yıldan artıq ğömere Kreml' sistemasındağı şifaxanälär belän bäyle. Kolesnikova Galina süzlärenä qarağanda, SSSRnıñ küp kenä xakimiät citäkçelären, çit il grajdannarın, tanılğan mädäniät, sänğät, ädäbiät ähellären däwalarğa turı kilgän.

Galina Kolesnikova süzlärençä, ul cide yıl şağir, dramaturg Nazıym Xikmät belän bergä yäşi. Alar Mäskäwdän yıraq bulmağan yazuçılar poseolığı Peredelkinoda ğömer itälär. Nazıym Xikmät wafat bulğannan soñ Galina Kolesnikova Votkinskiy şähärenä küçep qayta, Şulay itep şağir Nazıym Xikmätneñ äyberläre dä Udmurtiägä kilep ireşä. Galina Kolesnikova şağirneñ ğailä arxivın, anıñ qullanma äyberlären -mebel', sawıt—saba, kitaplar, al'bomnar, kiemnär - barlığı 900 danägä yaqın äyberen Votkinskiy şähäreneñ muzeyına tapşıra.

Galina Kolesnikova Nazıym Xikmät turında ike kitap yazğan, cide fotoal'bom çığarğan.

Votkinskiy şähäreneñ tarix häm mädäniätenä bağışlanğan muzey xezmätkäre Svetlana Morozova Nazıym Xikmätneñ äyberläre arasında iñ qäderle bulğan ber eksponat turında bolay dide

Radioalgıç Nazıym Xikmätkä tuğan ile awazın - Törkiädän tapşırularnı tıñlarğa mömkinçelek birgän. Şifaxanädä yatqanda şağir näq şuşı radioalgıçnı kiterülären sorağan. Radionıñ alğı yağı tuqımadan eşlängän, anda şağir törle illärdän alıp qaytqan znaçokların berketep barğan. Muzeyğa Galina Kolesnikova Nazıym Xikmätneñ 300 törle yıllarda häm törle illärdä näşer itelgän kitapların, p'yessaların, kinossenariyların tapşırğan. Muzey eksponatları arasında Nazıym Xikmätneñ äsärläre basılğan maşinkası da bar.

Xämidä Ğayfullina, İjaw

XS
SM
MD
LG