Accessibility links

дүшәмбе, 5 декабрь 2016, Казан вакыты 07:38

Tatar yegetläre nik xristian sektaların saylıy?


Qazan däwlät texnik universitetın tämamlağan tatar yegete sektağa monnan 2 aylar elek yöri başlağan. Yuğarı uqu yortın tämamlağaç ul üz küñelenä oşağan eş taba almağan, yaratqan qızı taşlağan. Yeget tulısı belän barı muzıkağa ğına birelgän. Sektağa da anı muzıka arqılı tartqannar - şunda barabanda uynarğa çaqırğannar. Yegetneñ änise üzeneñ häm ulınıñ isemnären äytmäskä ütenep “Azatlıq” radiosına kilgäç bolay dip söyläde:

Min anda bardım. Anda 30 yäşkäçä yäşlär bik küp. Barısı da tärtiple. Minem ulım xristian ädäbiäten uqığanğa borçıla başladım. “Vera i jizn'”, “Slovo i istina” sektalarına anıñ KAİda uqığan dusları da yöri.

Yegetneñ äniseneñ süzlärenä qarağanda, anda alarğa törle xristian yunäleşendäge matur kitaplar taratalar ikän. Atna sayın berär binada cıyılıp alar aralaşalar, xezmätläre uza. Şulay uq här kilgän keşe monda üzeneñ xezmät xaqınıñ küpmeder öleşen qaldırırğa tieş ikän. Yegetneñ änise:

Bu sektağa zur aqçalar kilä, çönki monda kergän härkem yä xezmät xaqınıñ 10 protsentın birergä tieş, yäki cıyıp 2шәр meñ tapşıralar, pensionerlar isä 1 meñ birälär.

Äytergä kiräk, bu sektağa kübräk aqıllı, ata-anaları baylar bulğan yäki üze keremle urında eşlägän yeget-qızlarnı cälep itärgä tırışalar ikän. Biredä tatar yegetläre bixisap di. Yegetneñ änise:

Min sezdä tatar yegetläre küpme dip soradım, şaqtıy dip äyttelär. Möselmannarda 5 waqıt namaz uqırğa kiräk, ä yäşlär yalqawlana. Bälki säbäp şuldır dip cawap birdelär. Şulay uq balalar baqçasında, mäktäptä, ğailädä dä rus telendä genä aralaştı. Bälki şul säbäple dä bulğandır.

Yegetneñ anası barlıq tatar yegetläre öçen borçıluın äytte. Xäzer qaydan da yärdäm sorarğa belmi aptırıy. “Azatlıq” radiosı moña açıqlı kertergä tırışıp Tatarstan Respublikası möftieneñ din eşläre buyınça yärdämçese Söläyman xäzrät Zaripov

Sektalarnıñ kübese sixer belän tä'sir itälär. Törle xristian, psevdoislam sektaları bar. Häm başqa keşelärne çığarıp bulmıy. Şuña imamnarğa, sektalarnı yaxşı belgän keşelärgä möräcäğät itärgä. Üzenä 3-4 yulnı kürsätep menä qaysısın sayla äydä dip tä'sir itärgä kiräk.

Söläyman xäzrät Zaripov belderüençä, älege yegetneñ küñelendä bulğan sorawlarına döres, tögäl inandıra torğan itep cawap birep kenä anı turı yulğa bastırıp bula häm monı barı imamnar ğına eşli ala.

Landış Xarrasova.

XS
SM
MD
LG