Accessibility links

җомга, 9 декабрь 2016, Казан вакыты 16:48

Rice Yaqın Könçığış säfärendä, Bush isä oppozitsiägä qaramastan Ğiraqqa yaña ğäskärilär cibärüne äzerli


Düşämbedä Quşma Ştatlarnıñ däwlät sekretare Condoleezza Rice Yaqın Könçığış säfären däwam itep, Mısırğa kitär aldınnan Yirusalimdä İzrail premyer-ministrı Ehud Olmert belän ikençe oçraşuın ütkärde. Ul arada amerikan prezidentı George Bush, Kongress qarşılıq kürsätsä dä, Ğiraqqa östämä ğäskärilär cibärü plannarın ğämälgä aşıraçağın belderde.

Yäkşämbedä Könbatış Yarda häm Ürdündä bulıp qaytqannan soñ däwlät sekretare Rice Yirusalimdä yänä İzrail premyer-ministrı Ehud Olmert belän oçraştı. Qısqa ğına waqıt eçendä berniçä möhim söyläşü ütkärsä dä, İzrail belän fälästinlelär arasında inde küptännän tuqtap qalğan solıx söyläşülärendä ällä ni zur alğakiteş buluı xaqında xäbärlär işetelmäde.

Yäkşämbedä Ramallada Rice barı tik, Quşma Ştatlarnıñ Yaqın Könçığıştağı eşlärgä qatnaşuın aktivlaştıru kiräk digän süzlär belän kileşüen genä äytte:

"Amerikanıñ solıx eşlärenä qatnaşuın tağın da tiränäytügä öndäwlärne min şaqtıy açıq itep işettem, di Condoleezza Rice. Yähüdlär wä fälästinlelär iminlektä, tınıçlıq wä demokratiädä yäşi alaçaq ber çişeleş tabu eşenä Quşma Ştatlar tulısınça tuğrı bulıp qala", dip ışandıra amerikan däwlät sekretare.

Ämma bu töbäktä nindi dä bulsa uñışqa ireşü Washington öçen älegä qatlawlı ber eş bulıp qala birä. Amerikan yağı inde ber ideä belän çıqqan ide - Yaqın Könçığışta solıx urnaştırunı beraz tizlätü maqsatında Quşma Ştatlar fälästin däwläten waqıtlı çiklär belän iğlan itüne täqdim itep qarağan ide. Fälästin idaräse başlığı Mäxmüt Ğabbas monı kire qaqtı.

Töbäktäge başqa täräqqiät tä Ricenıñ diplomatik tırışlıqlarına bik yardäm itmi. Ul premyer Olmert belän oçraşqan çaqta İzrailneñ tözeleş ministrı Könbatış Yardağı ber yähüd qasabasında tağın 44 yaña yort tözergä cıyınuın iğlan itte. Soñğı yıllarda eşlämäsä dä, ämma barıber ğämäldä sanalğan "yul xaritasında" yaña qasabalar tözüne tuñdırıp toru qaralğan ide.

Düşämbe kiçen Rice Mısır prezidentı Xösni Möbäräk belän oçraşa, sişämbedä ul Küwäytkä yul tota. Däwlät sekretareneñ şuşı säfäre Aq yort Ğiraqta yaña strategiä başlap cibärergä torğan çorda yasala. Washington bu strategiäneñ töbäktäge ğäräp illäre tarafınnan da yaqlanuın telär ide.

Quşma Ştatlarnıñ yaña omtılışı üzägendä Ğiraqtağı wäzğiätne totrıqlandıru, andağı ğisyançılarnı bastıru öçen östämä amerikan köçlären cibärü tora. Kongressta östenlek itkän demokratlar moña qarşı, ämma prezident Bush şuña da qaramastan bu xaqta inde qararğa kilüen äytä. Monı ul yäkşämbe kiçen tapşırılğan televizion interviewsında belderde.

Anıñ şuşı niäten vitse-prezident Dick Cheney dä yaqlıy häm Ğiraqtağı uñışnı ul Amerikanıñ terrorğa qarşı alıp barğan suğışı uñışına bäyli:

"Bin Ladennıñ strategiäsen onıtmağız, ä ul şunda ki, ul hiç kenä bezne açıqtan-açıq suğışta ciñüenä ışanmıy, ul bezne annan kitügä mäcbür itä aluına ömetlänä. Ğiraq bu köräştä suğış qırınıñ üzägendä tora, bez anda ciñärgä tieş, bu bik möhim, häm bez ciñäçäkbez dä", di Quşma Ştatlarnıñ vitse-prezidentı.

Kärim Kamal
XS
SM
MD
LG