Accessibility links

якшәмбе, 11 декабрь 2016, Казан вакыты 07:11

Ğiraqta Säddamnıñ ike elekke yuğarı yärdämçese asıldı


Düşämbe irtäsendä Ğiraqta Säddam Xösäyenneñ ike elekke yuğarı yärdämçese asılıp üterelde. Elekke küzläw başlığı Barzan İbrahim belän elekke İnqilab mäxkämäse başlığı Äwäd Xämit Äl-Bandarğa näq Säddämğa belderelgän ğäyepläwlär belderelde. Säddam üze 30 Dikäberdä asılğan ide.

Ğiraqnıñ maxsus tribunalı 5 Noyäberdä Säddam Xösäyen belän bergä bu ike keşene dä ülemgä xökem itkän ide. Säddamnıñ tuğanı elekke küzläw başlığı Barzan İbrahim Äl-Tikriti belän elekke İnqilab mäxkämäse başlığı Äwäd Xämit Äl-Bandar, Säddam şikelle ük, 1982 yılda Dücäil qalasında 148 şiğineñ ülemendä ğäyeple dip tabıldılar.

Säddam Xösäyen Dikäberneñ 30nda asıldı. Asuda qatnaşqannarnıñ berse küreneşne kesä telefonına yazdırğan. Säddamnıñ soñğı minutlarında kimsetelgän buluı küp şaw-şu häm tänqit tudırğan ide.

Ğiraq premier-ministrı kiñäşçese Bassam Ridha süzlärençä, bu yulı andıy kimsetülär bulmağan:

"Bu yulı barısı da tieşle däräcädä başqarıldı, bernindi kimsetülär, şiğär qıçqırular, tärtip bozular bulmadı" di premier kiñäşçese.

Şulay da ber qotıçqıç xäl bulğan. Asılğannarnıñ berse - Barzannıñ başı ğäwdäsennän özelgän. Bassam Ridha monı Allahı Täğälä ğämäle dip atadı:

"Kötelmägän ber xäl buldı. Barzannıñ başı ğäwdäsennän ayırıldı. Mondıy xällär siräk bula, bu Allahı Täğälä ğämäle, bula torğan xäl" di premier kiñäşçese.

Bassam Ridha süzlärençä, Barzan belän Bandarnıñ cäsadları cirläw öçen yaqın arada tuğannarına tapşırılaçaq.

Barzan belän Bandar Säddam çorında anıñ qararların miherbansız tormışqa aşırıp toruçı keşelär bulğan. 80nçe yıllarda Muxabarat, yä isä Küzläw xezmäte başlığı bulğan Barzan turında, ülem xökemnäre çığarılğan utırışlarda bu keşe tınıç qına yözem aşap utırğan, dip söylilär.

İnqilab mäxkämäseneñ elekke başlığı Bandar 1982 yılda Dücäil qalasında Säddam Xösäyenne üterü tırışlığı bulğannan soñ, andağı 148 şiğineñ üterelüe öçen ğäyeplände. Mart ayında ütkän mäxkämä utırışında ul üzenä belderelgän bar ğäyepläwlärne kire qaqqan ide:

"Xörmätle räis, ul çaqta Ğiraq suğış xälendä ide. İkençedän, alar Ğiraq prezidentına höcüm ittelär häm bu höcümneñ, anı bärep töşerü öçen, İran tarafınnan äzerlängänen tanıdılar" digän ide Mart ayında Äwäd Xämit Äl-Bandar.

Ülem cäzasına qarşı bulğan Ğiraq prezidentı Cäläl Talabani uzğan atnada bu ike keşegä cäzanı kiçekterergä täqdim itkän ide. Yäkşämbedä ul räsmi säfär belän Süriägä kitte.

Yewropa citäkçeläre dä bu cäzanı ğämälgä quymasqa çaqırğan ide. Düşämedä Yewropa komissiäse prezidentı Jose Manuel Barrosso häm İtaliä premier-ministrı Romano Prodi ülem cazasın tıyu mäsäläsen Berläşkän Millätlär däräcäsendä tikşerergä çaqırdılar.

Xökem itelgännärneñ advokatları, alarnıñ şikäyät itü häm başqa xoquqları tupas bozıldı dip, Ğiraq xökümäten xalıqara mäxkämägä birergä cıyına. Ğiraq räsmiläre cäzanıñ ğämälgä quyıluı töşerelgän videonı düşämbedä jurnalistlarğa kürsätte.

Ali Ğilmi
XS
SM
MD
LG