Accessibility links

дүшәмбе, 5 декабрь 2016, Казан вакыты 23:52

Dönya matbuğatı Fransiä eçke eşlär ministrı Nicolas Sarkozynıñ Prezident känäfie öçen köräşkä çığuı turında


Fransiäneñ xakimiättäge Xalıq xäräkäte berlege yäkşämbe könne eçke eşlär ministrı Nicolas Sarkozynı april-may aylarında ütäçäk prezident saylawlarına räsmi räweştä namzät itep çığardı. Dönya basmalarınıñ düşämbe sanı Fransiädä başlanıp kitkän säyäsi köräşkä zur ähämiät birä.

İzrailneñ Jerusalem Post basması Sarkozynı sulçı töp namzät, Sotsialist Segolene Royal belän qatı köräş kötä dip yaza. Aldağı 3 ayda aña häm Royalğa bik qatı qıynalırğa turı kiler kebek. İkese dä üz partiäläreneñ berdämlegen saqlap qalu öçen qatı tırışırğa häm ciñep çığu öçen urtaçıllar belän qırıydağılarnı üzlärenä cälep itärgä tieş dielä anda.

Kem genä ciñmäsen, Fransiäneñ kiläse prezidentı 12 yıl Xakimiättä bulğan Jacques Chiractan soñ yaña çornı başlawçı bulaçaq. Chirac öçençe möddätkä çıqmas kebek. Küp kenä saylawçılar yaña citäkçe Yewropada häm dönyada üzeneñ kiläçäge öçen, Qıtaynıñ iqtisadıy köndäşlege öçen, qaralar, Ğäräplär häm Möselmannar arasındağı eşsezlek öçen borçılğan ilgä yaña yul tabar dip ömetlänä. Jerusalim Post şulay dip yaza.

Britaniäneñ Financial Times gazetı Sarkozy aldağı säyäsi köräşne niçek alıp baraçağın kürsätep köndäşlärneñ virtual respublikasın üze täqdim itüçe çın respublika belän qarşı quydı dip yaza häm anıñ çığışınnan ber özek kiterä.Virtual respublika ğömümiläşterep irkäli, ämma keşelärne yul qırında ülärgä qaldıra. Çın respublika üze täqdim itkän xoquqlarnıñ näticälelegen täemin itä. Mondıy respublika eş urınnarı buldıra, yortlar tözi, eşçelärgä yäşäw öçen aqça qazanu mömkinlege birä, yarlı balalarğa mömkinlek birä häm härkemneñ qanunnı xörmät itüenä ireşä digän süzläre kiterelä Sarkozynıñ.

Financial Times tağın anıñ min säyäsätkä üzemneñ şäxsi xisläremne qatnaştırmasqa kiräk dip uylıy idem. Min keşeleklelek sıyfatı köçsezlek tügel, köçlelek ikänlegen añladım. Min üzgärdem digän süzlärenä dä iğtibar itä.

Sarkozynıñ ul süzläre turında Quşma Ştatlarnıñ Los Angeles Times gazetı da yaza.

Anda xakimiättäge urta uñ partiädän prezidentlıqqa täqdim itelgän Sarkozy ütkänne artta qaldırıp alğa taba xäräkät itärgä wäğdä birde häm Fransiä säyäsätendä yaña çornı açar dip kötelgän xälitkeç köräş başlap cibärde dielä.

Mäydanğa Sarkozy çığu belän April ayındağı ciñü öçen köräş üzlären şiklänüçän saylawçılarğa elekkelär törkemenä kermäwçe bularaq kürstüçe xarizmatik awır ülçämdägelärneñ yaqınnan bäreleşenä äwerelä. Soñğı yıllar eşsezlek, iqtisadıy üseşneñ aqrın baruı, möhäcirlär yäşi torğan yarlı bistälärdä çualışlar belän häm Fransiä ağımğa birelgän, inde üzgärä almıy digän xisneñ köçäyä baruı belän bilgelände dip yaza Los Angeles Times basması.
XS
SM
MD
LG