Accessibility links

сишәмбе, 6 декабрь 2016, Казан вакыты 08:47

Şäymiev jurnalistlar belän oçraştı


Çärşämbe könne Qazan kirmäne tağın küpsanlı qunaqlar belän tuldı. Bu yulı Tatarstan prezidentı Mintimer Şäymiev belän oçraşırğa respublikanıñ iñ möhim mäğlümät çaraları, şulay uq üzäk, çit il agentlıqlarınıñ wäkilläre, tatarlar yäşägän Rusiä töbäklärendä eşläwçe milli mäğlümät çaraları xäbärçeläre cıyıldı. Aldağı könnän ayırmalı bularaq, jurnalistlarnıñ sanı şaqtıy küp buldı. 100dän artıq mikrofon häm qäläm iäse aldında, 26 TV kamerası qarşında Mintimer Şäymiev ber säğät däwamında Tatarstannıñ sotsial’–iqtisadı qazanışları turında mäğlümätlär birde. Uzğan yıl yomğaqları buyınça iqtisadi üseş sänäğättä 7 protsentnı, tulayım respublika produktı 620 milliard sumnı täşkil itkän, tatarstanlılar ber yılda 210 milliard sumlıq tawar satıp alğan. Şulay uq prezident awıl xucalığında, tözeleştä ireşelgän uñışlar xaqında da söyläde. Oçraşuda süz Qazanda comğa könne uzaçaq Rusiä Däwlät Şurasınıñ utırışı xaqında da bardı. Ayırım alğanda, anda qaralaçaq toraq mäs’äläse, Mintimer Şäymiev citäklägän eşçe törkemneñ şuşı problemanı xäl itü buyınça täqdim iteläçäk çaralar turında äytte prezident.

Jurnalistlar üzläre dä sorawlar birde. Prezident alarnıñ barısına da bik täfsilläp cawap birde. Barı ber genä tema iğtibarsız qaldı diärgä bula. Şäymievnıñ yubileyı turında äytergä yäki anı qotlarğa teläwçelär teläklärenä ireşä almadı. Xörmätle prezidentınıñ yubileyı belän qotlarğa cıyınğan häm yalğış mine qotlarğa forsat bar dip süz başlağan ber jurnalist xanımnı Mintimer Şäymiev matur kön, bu xanımnıñ çibärlege belän qotlap cıyıluçılardan qul çaptırdı. Barı tik iñ axırğı soraw birüçe Aleksandr Latışev qına üze citäklägän Respublika Tatarstan gäcite xezmätkärläre isemennän qotlaw süzläre äytä aldı. Alay da bu barıber bäyrämçä oçraşu buldı.

Xäyer, Mintimer Şäymievnıñ üzen qotlıy almasalar da, törle mäğlümät çaraları prezident yubileyı uñayınnan täbrikläwlären citkerä alalar. Uzğan yäkşämbedä Rusiä kanalında taw başınnan çañğıdan şuıp yörüçe Tatarstan prezidentın kürsätep başlanıp kitkän tapşırular däwam itä. Comğa kiçendä Yaña ğasır kanalında İlşat Äminev töşergän ber säğätlek yaña dokumental’ fil’m efirğa çığaçaq. Ä menä şimbä könenä Piramida üzägendä prezidentnıñ tuğan könenä bağışlanğan mäcles planlaştırılğan. Bu çaranı alıp baruçılar bik üzençälekle bulaçaq. Berse – Rusiäneñ mädäniät eşläre agentlığı räise Mixail Şvıdkoy, ikençese – elekkege diktor, ä xäzer Qazan şähäre başlığı urınbasarı Zöhrä Niğmätullina.

Gölnaz İlgizär

XS
SM
MD
LG