Accessibility links

шимбә, 3 декабрь 2016, Казан вакыты 12:52

İslam konferensiäse oyışması wäkilläre Qazanğa kilde


İslam konferensiäse oyışması general' särqatibe kiñäşçese Nabika Diallo häm Senegal respublikasınıñ eş birü milli federatsiäse prezidentı Mansur Qama Tatarstan belän tanışu, xezmättäşlekne arttıru öçen kilgännär. Äytergä kiräk, Rusiä İslam konferensiäse oyışmasına küzätüçe il bularaq kerä. Häm Rusiä qısalarında Tatarstan bu yunäleştä iñ berençe eşlärne başqara. Bilgele bulğança, uzğan yılnı Tatarstan Prezidentı Mintimer Şäymiev ğäräp illärendä buldı, şulay uq İslam konferensiäse oyışması general' särqatibe Äqmäletdin Eqsanuglı belän dä oçraştı. Küräseñ oçraşu buşqa uzmağan, särqatibeneñ kiñäşçese Nabika Diallo äytüençä, bu säfärgä alarnı Äqmäletdin Eqsanuglı yullağan.

Tatarstan säwdä häm iqtisadıy xezmättäşlek ministrlıysında uzğan oçraşu barışında ministr Xafiz Salixov, törle şirqat citäkçeläre qatnaştı. Nabika Diallo:

İslam oyışması konferensiäsenä barlığı 57 il kerä. Bu Berläşkän millätlär oyışmasınnan soñ iñ öre Xalıqara oyışma bulıp tora. Bügenge köndä dönyada 1 meñ yarım milliard möselman yäşi. Bezne Tatarstan belän tığız elemtälär bäyli. Sezneñ Prezident İslam konferensiäse oyışmasınıñ ştab-fatirında da buldı. Alar general' särqatib Eqsanuglı belän dä oçraştılar. Äqmäletdin Eqsanuglı şulay uq Tatarstanda da bulğan ide.

Nabiqa Diallo Tatarstan Prezidentı Mintimer Şäymiev 2007 yılğı Soğud Gärabstanıyndağı Feysal patşa isemendäge premiäne aluın zur näticä dip qat-qat bilgeläp uzdı.

Tatarstan säwdä häm tışqı iqtisadıy xezmättäşlek ministrı Xafiz Salixov respublikanıñ iqtisadı belän tanıştırıp qunaqlarnı şaqqattırdı.

Senegaldan kilgän Mansur Qama bolay dide

Sezneñ respublika dönyadağı möselman ömmäte üseşenä bik zur öleş kertä ala. İslam illäre belän täcribä urtaqlaşu, fiker alışu öçen böten mömkinlegez dä bar. Bälki sez beläsezder 2007 yıl İslam konferensiäse oyışmasınıñ çaraları säwdä häm iqtisadıy üseş yunäleşe belän bäylängän. Häm ul çaralarnıñ 90 protsentı Afrikada uzaçaq.

Mansur Qama Tatarstan şirqat'lären Afrikada tanıtu kiräklegenä basım yasadı, eşlekle säfärlär oyıştıru turında fiker yörtte, şulay uq ul kiläçäktä İslam üseş bankı Tatarstanğa zur investitsiälär kertä alır ide bilgeläp uzdı. Monnan tış oçraşuda Tatarstanda da İslam finans institutların buldıru turında süz alıp barıldı. Bu xaqta Tatarstan säwdä häm tışqı iqtisadıy xezmättäşlek ministrı Xafiz Salixov

Bez törle yunäleştä eşlär alıp barabız. Xäzer Malayziä wäkilläre proyektı qarala häm biznes-proekt tözelä.

Ministr Xafiz Salixov İslam konferensiäse oyışması wäkilläre 3 kön buyı Tatarstan belän tanışqaç, näticä çığaru nisbätennän comğa könne tağın ber oçraşu bulaçağın äytte. Çönki oçraşuda urtaq investitsion kompaniä buldıru turındağı fiker dä äytelde.

Landış Xarrasova

XS
SM
MD
LG