Accessibility links

шимбә, 3 декабрь 2016, Казан вакыты 14:43

Könbatış matbuğatı Rusiäneñ Kosovo mäsäläsenä mönäsäbäte turında


Rusiä tışqı eşlär ministrı Sergey Lavrov sişämbe könne Serbiädän bäysezlekkä omtıluçı Kosovo mäsäläse çişeleşe Serbiäne dä Kosovonı da qänäğätländererlek bulırğa tieş dip belderde. Bu atnada şulay uq Serbiä premyer ministrı Vojislav Kostunitsa Rusiä prezidentı Vladimir Putin Belgrad riza bulmasa Rusiä BMO İminlek Şurasında Kosovonıñ bäysezlegen xuplamıyaçaq dip äytte dide.

Kreml Belgrad möräcäğäte nigezendä Kostunitsanıñ telefon aşa Rusiä prezidentı belän söyläşkänlegen, häm Putinnıñ aña Rusiäneñ prinsipial pozitsiäsen qabatlawın rasladı. Britaniäneñ Financial Times gazetı şulay dip yaza.

Gazeta Putinnıñ usğan sintäber ayında Rusiä BMOnıñ Kosovodağı wäkile Martti Ahtisaari täqdim itkän plan belän kileşmäsä aña İminlek Şurasında veto salu mömkinlege turında äytkän süzlären iskä töşerä.

Ahtisaari üz planın bu yäkşämbedä ütäçäk ğömümi saylawlardan soñ täqdim itärgä cıyına.

Ahtisaari planı Kosovoğa Yewropa Berlege citäkçelegendäge bäysezlek täqdim itär dip kötelä. BMO İminlek Şurasında Rusiäneñ pozitsiäse bik möhim bulaçaq. Koştunitsa äytüençä Rusiä prezidentı çişeleşneñ territorial berbötenlek prisnibına nigezlänergä tieşlegenä basım yasağan dip yaza Britaniäneñ bik abruylı basması Financial Times.

İrlandiäneñ İrish Times gazetı Serbiä räsmiläreneñ tağın ber märtäbä BMOnı Kosovo yazmışı turında täğäyen qarar qabul itüne kiçekterergä çaqıruı turında yaza.

Mäskäwneñ pozitsiäse anı küpçelek xalqın albannar täşkil itkän Kosovonıñ küzätü astındağı bäysezlegen yaqlawçı Waşington häm Yewropa Berlege belän qarşılıqqa quya dielä anda.

Gazeta 1999 yılda Serb köçläreneñ Kosovo albannarın qanlı räweştä bastıruına çik quyğan NATO bombalawlarınnan birle Serbiäneñ cirläreneñ 15 protsentın täşkil itkän bu töbäkneñ BMO tarafınnan idarä itelep kilüen iskä alıp uza.

Häm bolay dip däwam itä. 2 million xalqı bulğan, şularnıñ 90 protsentın albannar täşkil itkän Kosovo inde iskerep tuzğan säyäsi uyın tubına äwerelä. Waşington häm Yewropa Berlege töbäkneñ bäysezlegen teli. Şunıñ belän Yugoslaviäneñ tarqaluı turındağı kitapnı nihayät yabarğa häm zur küpçelegen möselmannar täşkil itkän ölkädä uñışqa ireşergä teli.

Rusiä isä täğäyen çişeleşne mömkin qädär kiçekterergä häm şunı Könbatış belän diplomatik söyläşülärdä satulaşu öçen qullanırğa teli, Serb säyäsätçeläre bu mäsäläne yäkşämbe könne ütäçäk ğömümi saylawlarda saylawçılarnıñ yaqlawına ireşü öçen faydalana
di İrlaniäneñ İrish Times gazetı.
XS
SM
MD
LG