Accessibility links

шимбә, 10 декабрь 2016, Казан вакыты 09:59

Balalı ğailälärgä däwlät yaña aqça wäğdä itä


Soñğı arada balalı ğailälärgä däwlät tarafınnan zur iğtibar birelä başladı. “Ana kapitalı” turındağı qanun yäğni ikençe yäki öçençe sabıyın tapqan änilärgä 250 meñ sumğa sertifikat birelü kebek yañalıqlarğa tağın ike yaxşı xäbär östälde. Xäzer balanı yäş yarım tulğançı üsterüçe analar aylıq posobiene artığraq itep alaçaqlar. Şulay uq, yañartılğan qanun nigezendä, ata-analarnıñ balalar baqçasına tülängän aqçağa kompensatsiä alu mömkinlege dä bar.

Bilgele bulğança älege yılnıñ berençe ğinwarınnan “Balalı keşelärgä däwlät tüläwläre turında”ğı Federal' qanunğa östämälär kertelde. Şularnıñ berse öydä bala qarap utıruçı analarğa aylıq posobiene arttıru xaqında. Ägär elek yäş änilär ay sayın eş urınınnan 700 sum aqça alğan bulsalar, xäzer isä anıñ küläme kimendä 1,500 sumğa qädär arttırılğan. Busı berençe bala öçen. İkençe häm annan da kübräk bala öçen isä analarğa 3000 sum tüläyäçäklär ikän. Bu aqçalarnı dekret yalına çıqqançı eşlägän analar da, eş urınnarı bulmağan änilär dä ala alaçaq. Posobieneñ niçek tülänüe turında Tatarstannıñ sotsial' yaqlaw ministrı yärdämçese Ence Minhaceva söyli.

Yäş änilärgä balağı yäş yarım tulğançı ay sayın tüli torğan posobie xäzer aylıq eş xaqınnan 40 protsent dip sanala. Şul uq waqıtta ul 1,500 sumnan artmasqa, 6000 sumnan kim bulmasqa tieş. Dekret yalğa eş urınınnan kitkän analar älege aqçalarnı alu öçen eş urınına barıp ğariza yazarğa tieş. Eşlämägän analar elek bötenläy posobie almıy idelär, ğinwar ayınnan alarğa da şul uq külämdä aqça tülänä başlayaçaq. Monıñ öçen alar üzläre torğan urınına sotsial' yaqlaw büleklärenä barıp ğariza yazarğa häm qayber dokumentlar iltergä tieş. Alar: pasport, balalarnıñ tuu tanıqlıqları, eşlämäwlären isbatlawçı käğäz, şulay uq başqa dokumentlar da kiräk bulırğa mömkin. Çönki qayber oçraqlarda balanıñ ätise dä, änise dä eşlämi, pasportlarında torğan urınnarı törleçä yazılğan bula. Şuña kürä yä ätise, yä änise sotsial' yaqlaw büleklärenä başqa cirdän posobie almawların isbatlawçı dokument alıp kilergä tieş. Aqça Aq Bars bank aşa tülänä, şuña kürä ata-ana şul bankta sçet açıp, anıñ nomerın da äytergä kiräk. Posobie ğinwar ayınnan tülänä başlıy.

Ence Minhaceva äytüençä, ğinwar ayında uq barlıq dokumentların cıyıp beterä almağan ğailälärgä borçılırğa urın yuq. Dokumentlarnı qayçan ğına tapşırsalar da, posobie ğinwar ayınnan başlap tülänäçäk.

Balalı ğailälär öçen qanunğa tağın ber yañalıq kertelgän. Ul sabıyları balalar baqçasına yörgän ğailälärgä qarıy. Xäzer ata-analar balalar baqçasına tülängän aqçanıñ küpmeder öleşen kire qaytara ala. Balalar baqçasına yörgän berençe bala öçen tülängän aqçanıñ 20 protsentın alıp bula. İke bala yörsä, kompensatsiä här bala öçen tülängän aqçadan 50 şär protsent, öçär häm tağın da kübräk balaları yörsä, 70 şär protsent qaytarılaçaq. Monıñ öçen ğailägä sotsial' yaqlaw büleklärenä ğariza yazarğa, pasport, bala tuu tanıqlığı, balalar baqçası belän tözelgän şartnamäneñ kopiäsen, baqçağa tülängän berençel aqçanıñ kvitansiäse häm Aq Bars bankta açqan xisapnıñ nomerın alıp kilergä kiräk. Ence Minhaceva äytüençä, älege dokumentlarnı balalar baqçasına da kiterergä mömkin.

Güzäl Zıyätdinova

XS
SM
MD
LG