Bögön Yılayırźa şağir Şäyexzada Babiçtıñ qaldıqtarı qaytanan erlände. Niźän käräk buldı huñ uźğan bıuat başında qıźıldar tarafınan ülterelgän irekle başqort şağirınıñ käüźähen quźğatıu. Eş şunda, Babiç qäbere tip yörötölgän urında unıñ qaldıqtarı tügel tigän feker taralğaynı. Bıltır qäberźäge höyäktär antropoloğtar tarafınan entekle tikşerelde. Ularźıñ şağir Şäyexzada Babiçtıqı bulıuı raślandı. Oşonoñ menän säyäsätkä äylänä barğan añlaşılmausanlıqqa nöktä quyıldı. Yılayır urıśtarı qäberźä ısınlap ta Babiç erläneüen tanığan. Älbittä, irek ösön köräşkän şağir, Zäki Välidiźeñ arqadaştarınıñ bereheneñ käüźähen ber bıuat samahı ütkäs tä tanıu yaqşı eş.Tik mäsäläneñ ikense yağı bar. İslam qaytanan erläü keüek küreneştärźe xuplamay. Azatlıq radiohı xäbärsehe Öfönöñ İxlas mäsete imam– xatibı Sälmän xäźrättän oşo turala fekere menän qıźıqhındı.
Şäyexzada Babiçtıñ qaldıqtarın qaytanan erläü xaqında respublika xökümäte dekabr aźaqtarında qarar itkäyne. Bögön şağirźıñ höyäktären erläügä arnalğan waqiğalarźa mäźäniät häm milli säyäsät ministrı İldus İleşov qatnaştı. Ul Babiçtıñ höyäktären qaytanan er quyınına tapşırıu beźźeñ burısıbıź, üź xalqınıñ azatlığı ösön köräşep baş halğan millättäşebeźgä xörmät kürhäteü, tarixi döröślöktö qaytarıu tine.
