Accessibility links

дүшәмбе, 5 декабрь 2016, Казан вакыты 13:34

Başqortstan senatorı ğäyeben tanımıy


Başqortstannan Rusiä Federatsiä şurasına saylanğan elekke senator İgor İzmest'yevnıñ berniçä kön elek Qırğızstan başqalasında qulğa alınıp Mäskäwgä ozatıluı xaqındağı xäbär respublika cämäğätçelegeneñ iğtibar üzägendäge temalarnıñ berse. İnde comğa könne Mäskäwdäge Basman mäxkämäseneñ İzmest'yev äfändene 10 köngä tikşerü bülegenä yabıp totu turında qarar qabul itüe dä mäğlüm buldı. Şuşı könnärdä Rusiä General' prokuraturası İzmest'yev äfändegä qarata ğäyeplärne bäyän itäçäk dip kötelä. İzmest'yev äfändeneñ qulğa alınuı häm anıñ keşe üterülärdä ğäyeplänüe Başqortstannıñ räsmi xakimiätlärenä dä qara tap bulıp yattı.

İnde baytaq qına kiñ mäğlümat çaralarında yazıluınça, Başqortstannan senator itep saylanıp, biş yıl çaması şuşı yuğarı känäfidä utırğan häm respublika citäkçelege belän moña qädär dustanä mönäsäbätlärdä bulğan İzmest'yevqa xäzer ällä küpme ğäyeplär tağılırğa mömkin. Misal öçen, “Komsomol'skaya pravda” gäzite 19 ğinwar sanında yazuınça, İgor İzmest'yevnıñ biş keşene ütertüne oyıştıruda qatnaşı buluı ixtimal. Ul märxümnärneñ barısı da Başqortstan neft' sänäğäte tarmağına qağılışı bulğan şäxeslär. Kübese yuğarı wazıyfalar da bilägän ide.

İgor İzmest'yev isä älegä barlıq ğäyepläwlärne dä kisken kire qağa. “Bu wäzğıyättä mine barı tik aqçalar öçen genä qısalar”, - dip belderä ul. Ämma nindi aqçalar öçen ikänen atap äytmi.

Mäğlüm ki, Başqortstannıñ neft' kompleksında üz biznesı bulğan İgor İzmest'yev bik bay eşquar sanala. Mortaza Räximovnıñ ulı Ural belän dä bik yaqın duslar bulğanlığı bilgele. Ämma wäzğıätlär üzgärep tora, duslar da doşmanğa äylänergä mömkin. İğor İzmest'yevnı törle gönahlarda, xätta yallap keşe üterüdä qatnaşı buluda ğayıpli başladılar.

Başqortstandağı bäysez säyäsät belgeçläre İzmest'yev äfände tiräsendäge soñğı xällärgä añlatma birep, anıñ zur aqçalar häm säyäsi intrigalar qorbanı buluı ixtimallığına da işarä yasıy. Xäzer senatorlıq qağılğısızlığı tartıp alınğaç, Başqortstandağı barlıq yallap üterü oçraqların da İğor İzmest'yevqa ğına tağuları ixtimal, dip belderä alar. Läkin şul uq waqıtta İzmest'yev äfände dä awızına su qabıp tormasqa mömkin. “Kiñ cämäğätçelek öçen mäğlüm bulmağan bik küp qızıqlı xällärne açıp salırğa mömkin äle ul, - dip iskärtä respublikadağı Berläşkän opozitsiä şurası wäkilläre dä. – Ä monısı inde Başqortstan xakimiätlärenä dä bik küñelle bulmasqa mömkin”.

Şuşı uq fikerlär belän Başqortstandağı tanılğan ğalim İldar Gabdrafıykov ta urtaqlaşa. “Närsä, Başqortstan citäkçeläre İgor İzmest'yevnıñ kem ikänlegen moñarçı belmägännärmeni, belgännär, älbättä, läkin anıñ gönahları açıqlana başlağaç, añardan tizräk qotılırğa uylağannar”, - di İldar äfände.







XS
SM
MD
LG