Başqortstanda xärbi xezmät ütüçe soldatlarğa bäyle çirattağı ğädättän tış xäl buldı. Ufadağı ber xärbi bülektä atnakiç könne ber soldatnıñ ülüe turında xäbär itelde. Azamat Xäsänov isemle tatar yegete armiä saflarına 2005 yılnıñ yazında Başqortstannıñ Boray rayonınnan çaqırılğan bulğan. Täwge mäğlümatlarğa qarağanda, Mäskäwdäge ber xärbi bülektä xezmät itä ul. Soraw tua: ä nişläp soñ Ufadağı garnizonda ülgän ul? Başta anı Ufanıñ Lenin rayonındağı xärbi garnizon komendaturasına xezmätkä küçergän bulğannar, digän xäbär taralğan ide. Ämma soñraq Azamat Xäsänovnıñ çınlap ta Mäskäwdä xezmät itkänlege, küptän tügel, xezmät urının röxsätsez qaldırıp kitkänlege xaqında äytelde. Ufa komendaturasında anı şuşı ğämäle öçen şartlı räweştä ber yılğa iregennän mäxrüm itü häm anı kire Mäskäwgä ozatu turında qarar itelgän bulğan.
Älegä soldatnıñ üleme xaqında tögäl genä mäğlümatlar aluı qıyın. Bik saq qına, ülçäp kenä birelgän xäbärlärdän belenüençä, inde bu yazda xezmäten tutıraçaq soldat üz-üzenä qul salğan, asılınıp ülgän dilär. Başqortstan Xärbi komissariatında da bu faciğä turında mäğlümat birä almadılar. Komissariatnıñ matbuğat üzäge citäkçese Çernenqo äfände Xärbi prokuraturağa möräcäğät itü täqdimen genä yasadı.
Anıñ kiñäşe belän “Azatlıq” xäbärçese Xärbi prokuraturağa da möräcäğät itte. Läkin anda “baş prokuror Vladimir Ovçinnikov urınında yuq, näq şuşı faciğäne tikşerü mäsäläse belän yöri” didelär. Anıñ elegräk başqa mäğlümat çaralarına birgän qısqa ğına cawaplarınnan kürenüençä, ryadovoy soldat Azamat Xäsänov çınlap ta Ufa komendaturası binasında üze asılınğan kebek kileş qıäfättä tabılğan. Xäzer anda tikşerü eşläre bara. İdel buyı xärbi okrugınnan da wäkillär kilgän. Faciğağa bäyle “Xärbi xezmätkärne ülemgä kiterep citkerü oçrağı” digän maddägä asäsan, cinayät eşe açılğan.
