Accessibility links

шимбә, 3 декабрь 2016, Казан вакыты 20:51

Merkel belän Putin Soçida oçraşa: <br>kön tärtibendä energiä mäsäläse


Comğa kön Qazanda bulğan Rusiä prezidentı Vladimir Putin yäkşämbedä Soçi utırmasında Germaniä kanslerı Angela Merkel belän oçraşa. Yıl başınnan Germaniä Yewropa Berlegendä räislek itä başladı. Söyläşülär üzägendä Yewropa Berlege belän Rusiä arasında xezmättäşlek kileşüe häm energetika mäsäläläre torır dip kötelä.

Qara diñgez buyındağı Soçi kurortında ütäçäk bu oçraşuda nindider zur qazanışlar kötelmi, şulay da, qayber çeterekle mäsälälär kütäreläçäk. Şularnıñ berse – energiä iminlege mäsäläse.

Küptän tügel Rusiä belän Belarus arasında qupqan bäxäs waqıtında Yewropanıñ berniçä ilenä, şul isäptän Ğermaniägä neft cibärü tuqtalıp torğan ide. Angela Merkel, mondıy kisätüsez beryaqlı adımnar Rusiäneñ abruyın töşerä dip, Mäskäwgä tänqit beldergän ide.

"Dönya säyäsätendä Rusiä" isemle jurnal möhärrire Fedor Lukyanov fikerençä, Putin Merkel belän oçraşu waqıtında şuşı töşkän abruynı kütärergä tırışaçaq:

"Bu xaqta söyläşü küp bulır dip uylıym. Çönki Yewropa Berlegeneñ borçuları zur, Putin Merkelne tınıçlandırırğa, monı waqıtlıça awırlıq bulğan dip ışandırırğa tırışır" di Fedor Lukyanov.

Söyläşülärdä şulay uq Yewropa Berlege belän Rusiä arasında xezmättäşlek turında kileşüne yañartu mäsäläse dä kütäreler dip kötelä. 10 yıl elek tözelgän bu kileşüneñ möddäte şuşı yılnıñ Noyäberendä çığa.

Bu xaqta söyläşülär uzğan yıl başlanası ide. Läkin Berlek äğzası - Polşa, Rusiäneñ it kertüne tıyuına cawap itep, bu mäsäläne tikşerügä veto saldı.

Mäskäw üzeneñ adımın Polşadan kilgän itneñ sıyfatı belän añlatsa, Warşaw – anı Mäskäwneñ üç aluı dip atadı.

Şuşı atnada Berlinda Yewropa Berlege, Polşa häm Rusiä räsmiläreneñ kiñäşmäse ütte.

Säyäsät belgeçe Fedor Lukyanov fikerençä, Soçi oçraşuında bu mäsälädä ällä ni qazanış bulmas, ixtimal, Polşanıñ vetosı alındı, eşne başlarğa bula dip iğlan iteler.

Germaniäneñ elekke kanslerları belän çağıştırğanda, Merkel Kremlgä qarata tänqitçänräk qaraşta tora, dip sanala, şulay da Soçida qatı süzlär äytelmäs kebek:

"Kohl belän Şröder kommunistlardan soñğı Rusiäne yaña partner dip qabul itsä, Merkel ara totırğa tırışa, andağı iske kommunistik idealarnı äle dä sizä, yaqınayırğa bik telämi. İkençe yaqtan ul Germaniä mänfäğätlären yaqlarğa kiräklegen añlıy, şuña kürä Rusiä belän strategik xezmättäşlekne alğa sörä. Läkin bu mönäsäbätlär ihlas tügel" di Germaniäneñ Korber üzägendä Rusiä belgeçe Alexandr Rahr.

İhlasmı, tügelme, Merkelneñ Putin belän elekke kanslerlarnıqı şikelle ül duslığı bulmasa da, nıqlı eşlekle mönäsäbätrlär taläp itkän, mänfäğät digän närsä bar.

Ali Ğilmi
XS
SM
MD
LG