Accessibility links

җомга, 9 декабрь 2016, Казан вакыты 14:51

Dakarda Tatarstan taqımı 2nçe urında


Bıyılğı Lissabon-Dakar yarışları Çallı uzışçılarına älläni dan-şöhrät alıp kilmäde. Moña qädär yök maşinaları arasında gel berençelekne alıp kilgän "KamAZ master" komandası 2007 yıl yarışlarında 2 häm 7 urın belän genä qänäğätländelär. Şulay da, Vladimir Çagin ekipajınıñ berençe urında barğan waqıtta 3 metrlı taş kisägenä bärelep qaplanuı, şunıñ belän yarışlardan töşep qaluın isäpkä alsañ, İlgizär Märdiev maşinasınıñ ikençe bulıp kilüe dä zur uñış, digän fikerne äytüçelär bar. Bilgele bulğança, Märdiev ekipajı berençelekne alğan hollandiäle Xans Steysidan 3 säğät 10 minut 52 sekundqa qalışa. Ä menä tağın ber Çallı ekipajı, Sergey Reşetnikov hollandiälelärdän 7 säğät 47 minutqa soñarıp kilä. Bıyıl keçkenä genä üzençälek buldı, KamAZ canatarları soñğı, 15 etapqa tügel, 14 etap yarışların küzätergä dä kilgännär ide. Bilgele, canatarlar arasında iñ tanılğanı KamAZ citäkçese Sergey Kogogin bula. Älege aksionerlıq cämğıäteneñ mäglümät säyäsäte direktorı Vladimir Samoylov xäbärennän kürengänçä, Rusiä, Tatarstan, älämnären kütärgän canatarlar uzışçılarnı - "KamAZ- çempion" digän süzlär belän qarşı alalar. Läkin belgänebezçä, QamAZ çempion bulmıy şul. Çallıda eşlängän avtomobil'lärneñ küptänge köndäşläre- Çexiä "Tatrası"- bıyılğı uzışta öçençe buldı. Yarışlarnıñ ğomumi näticälärenä küz salsaq, şul kürenä, ciñel avtomobil'lär häm mototsikllar uzışlarında aldınğı urınnarnı aluçılar arasında Rusiä sportçıları bötenläy yuq. Mototsikl yarışında berençe ikençe urınnarnı Fransiä, öçençe urınnı AQŞ wäkilläre ala. Ciñel avtomobil'lär arasında da berençe öç urınnı Fransuzlar yaulıy. KamAZ-Masterğa kilgändä alar 24 ğinwarda Çallığa qaytırğa tieşlär.

Çallı, Ğafiulla Ğaziz

XS
SM
MD
LG