Accessibility links

пәнҗешәмбе, 8 декабрь 2016, Казан вакыты 05:20

Rusiä däwlät şurası prezidiumı utırışı ütte


Rusiäneñ törle töbäklärennän cıyılğan ilküläm däräcädäge şäxeslär, xäyerçe ildä toraq mä’säläsen xäl tiergä tırıştılar. Yaña programmanıñ töp devizı - toraq härkem ala alırlıq bulırğa tieş. Ber mäzäk iskä töşä. Ägär bu programmanı ğalimnär uylap çığarsalar, etlärdä tikşererlär ide. Läkin monı säyäsätçelär uylap tapqan, dimäk, xalıqta täcribä ütkäräse bula.

Rusiä däwlät şurası utırışında töp iğtibar munitsipal' sotsial' toraq fondın tözügä yunältelde. Eşçe törkem çığarğan töp näticä - bügenge köndä fatir alırğa teläwçelärneñ sanı belän fatirlarnıñ sanı täñgäl tügel. Soraw härçaq kübräk, şunlıqtan, kvadrat metrğa könnän kön bäya arta.

Näticädä toraq satu ölkäsenä rişwätçelek kerä. Bu xäl belän köräşü yulların Rusiä prezidentı V.V. Putin menä nidä kürä.

Bez niçek tä bulsa toraqnıñ üz tözeleş bäyäsen töşerergä tieşbez. Älbättä kvadrat metr bäyäsendä tözeleşkä kitkän çığımnar da kertelgän. Läkin şul uq waqıtta bu bäyägä rişwättän kergän aqçalar da kerä. İnfrastrukturağa kilsäk, monda bik küp mäs'älälär tua. Läkin qayber töbäklärdä anı xäl itälär. Menä Tatarstanda qarıy. Uzğan yıl kvadrat metr öçen 16 ide, bıyıl da şul unaltı meñ ul. Dimäk monda döres mexanizmnar urnaştıra belälär.

Ämma eşçe xalıq öçen 16 meñ tabuı da qıyın. 4 meñ sum xezmät xaqınnan komunal' xezmätkä tüliseñme, fatir öçen biräseñme, östäwenä yäşise dä bar. Eşçe törkem täqdime buyınça toraq fondınıñ 20 % az keremle ğailälärgä, 10 % sotsial' xezmät ölkäsenä yunälderelergä tieş.

Tağın ber mäs'älä toraq fondına kapital' remont yasaw. Anıñ 40 % tözekländerügä moxtac. Töbäk citäkçeläre, tözekländerü öçen aqçanı Rusiäneñ finans ministrlıysınnan alırğa kiräk digän fiker ütkärde. Läkin finans ministrlığı üz çiratında kapital' remont mä’säläsen milekçelär xäl itärgä tieş dip belderde. Tatarstan prezidentı Mintimer Şäymiewneñ bu mä’sälägä qarata mondıy mönäsäbättä.

Tözekländerü eşlären byudjet subsidiäläre häm milekçelär xisabına başqarırğa kiräk. Tözekländerü öçen tüläw däwlät tarafınnan raslanğan bilgele ber standartlarğa turı kiterep eşlänergä tieş. Mondıy tüläwlärdä däwlät törleçä milekçelärgä kreditlar, protsentlarnı kimetü räweşendä me, yärdäm itergä tieş.

Soñğı könnärdä toraq turında küp söylände. Bu mäs'älä xätta il başlıqların da tämam ardırğan bulsa kiräk. Şuña kürä dä, Vladimir Putin belän kürgäzmädä yörgändä, Mintimer Şäymiev ministr Marat Xusnullinnıñ toraq turında söyläwlären tuqtatıp, üzeneñ aldağı plannarı belän büleşte.

Yaqın kiläçäktä Tatarstan başlığı, Qazan belän 25 çaqrım yıraqlıqtağı ber rayonnı berläştermäkçe ikän.

Şulay uq Respublika başlığı, Mäskäw merı Lujkov äfände Rusiä başqalasında Siti, yäğni ayırım şähärçek tözegän kebek, Qazan urtasında da şundıy Siti tözemäkçe bula.

Şulay itep prezidentıybıyznıñ tuğan könendä däwlät şurası prezidiumı utırışında räsmilär toraq turında uylandı. Şuşı öç köndä bu mäs'älä iñ yuğarı noqtasına kütärelde. Rusiä prezidentı V.V. Putinnıñ “Yullar tözü bik möhim, ämma kemder şuşı yullarda “Mersedeslarda” cilderep yörgändä başqalarnıñ baraklarda kön kürülärenä küz yoma almıybız” digän fikere, moña tağın ber dälil bulıp tora.

Ğädel Galämetdinov

XS
SM
MD
LG