Accessibility links

җомга, 2 декабрь 2016, Казан вакыты 22:57

“Yalqınlı yäşlek” Samarda 700-nçe konsert kürsätte


Samarnıñ Metallurglar mädäniät Sarayında “Yalqınlı yäşlek” ansamble üzeneñ 700-nçe konsertın kürsätte. İke bülektän torğan öç säğätlek konsert programmasında 20 artist qatnaştı. Ansambl'gä yäşlär daimi kilep toralar, läkin dä bıyılğı kebek ağılıp kilgännäre yuq ide äle. Ansambl'neñ veteranına äylänep baruçı İlnur Altınbaev tamaşanı açıp cibärde häm, äytergä kiräk, İlnurnıñ ikençe sulışı açılıp kitkän, yegetlek uzıp irlek sıyfatları kerep urnaşqan, tawışında bärxetlek urın alğan. İrlär küp. Al'bert Cabbarov, Rinat Azizov, İldar İvaev, Cämil Nağayıvlar tışqı qiäfätläre belän dä, repertuarları belän kisken ayırılıp toralar. Al'bert Cabbarov ciñel estradanı saylasa, Rinat Azizov Sara Sadıqovanıñ cırlarına östenlek birgän, ä inde Cämil Nağayıvnıñ tawışı qoyıp quyğan Salawat diärseñ, barlıq cırların da ataqlı cırçıbız repertuarınnan küçergän häm bälki şuñadır iñ küp alqışlarnı yauladı. Tağın küzgä taşlanğan äyberlärneñ berse - ul duetlar. Här ir- yeget parlap cırlap tamaşaçını quandırdılar. Yarata bit bezneñ tatar parlap cırlawnı. Här konsertta soñğı cırçı programmağa noqta quyuçı bula. Ä “Yalqınlı yäşlek”tä bu yulı noqtanı ansambl'neñ Däw änisenä äylängän Aysılu xanım Äbdieva quydı. Aysılunıñ tawışı äyterseñ lä mädäniät Sarayı divarlarına sıyışa almıy diärseñ. Yomşaq tatar moñı ağıldı da, ağıldı. Bügenge köndä “Yalqınlı yäşlek” ansamblendä Aysılu Äbdievadan da ostaraq itep tatar xalıq cırların başqaruçı älegä yuq.

Samar Duslıq yortı direktorı Dmitriy Myul'bax söyli:

“ Konsert programması turında min bik yaxşı fikerdä. Berençe çığıp cırlağan İlnur Altınbayıvnı min Qazannan kilgän artist dip uyladım. Kiemendä, säxnä tärtibendä yuğarı zıyalılıq, tawışı soqlanırlıq. Min bu konsertta berençe märtäbä. Telägem – bu kollektiv saqlanırğa tieş.

Konsert turında tamaşaçılar fikere:

Yegetläre dä, qızları da soqlanırlıq. Bez härwaqıt yaratıp kiläbez “Yalqınlı yäşlek”kä.

Räxmättän başqa süzebez yuq. Buldıralar.

“Yalqınlı yäşlek” ansamble yuña konsert programmasın ölkäneñ tatar awıllarında, Tol'yatti, Sızran, Yaña Kuybıyşev şähärlärendä dä kürsätergä niätlänep yäşi.

Şamil Bahautdin, Samar

XS
SM
MD
LG