Accessibility links

шимбә, 10 декабрь 2016, Казан вакыты 08:20

Serbiä saylawlarında tawışlarnıñ küpçelegen radikal'' millätçelär yawlıy, ämma alarnıñ yaña xökümät tözüe ikele


Yäkşämbedä Serbiädä uzğan parlament saylawlarında tawışlarnıñ iñ zur öleşen ütä-millätçe serb radikal'' partiäse qazandı, ämma şuña da qaramastan, ilneñ yaña xökümäten tözü bäxete aña töşmäs kebek. Monı ikençe häm öçençe urında kilgän häm, ütä millätçelär belän çağıştırğanda, kübräk reformaçıl sanalğan başqa ike partiä eşli ala.

Uzğan yılda Montenegro bäysezlek iğlan itep, anıñ belän däwlät berlege tarqalğannan soñ Serbiädä mondıy zur saylawlar berençe märtäbä ütte. Anıñ näticäläre şunı kürsätä - millätçelekkä sabışu arqasında yıllar buyı ayırımlanıp yäşäwgä, şul säbäple törle suğışlar aşa ütüenä häm iqtisadi awırlıqlar kiçerüenä qaramastan, Serbiä xalqınıñ zur öleşe äle haman da şul millätçel xislärdän arına almıy.

Bu millätçelekne gäwdäländerüçe bulıp Serb radikal'' partiäse tora, anıñ elekke citäkçese Vojislav Şeşel xäzerge waqıtta Haagta, xalıqara mäxkämä tarafınnan ul elekke yugoslav cirlärendä barğan suğışlar waqıtında xärbi cinayätlär qıluda ğäyeplänä.

Şuña da saylawlarğa äzerlekne bu yulı partiäneñ xäzerge başlığı Tomislav Nikoliç citäkläde häm düşämbegä qarşı töndä ul üz tarafdarlarınıñ parlamenttağı 250 urınnan 81-en yawlawın iğlan itte. Tik deputatlar sanı yağınnan serb radikalları berençelekne yawlasa da, alar xökümät qorırlıq küpçelekkä ireşä almadı - Nikoliç ta monı şunda uq tanıdı:

"Bez xökümät tözü mömkinlegenä iä bulmayaçaqbız. Ämma şul da ap-açıq - bezneñ belän eş itmiäçägen belderep kilgännärneñ dä xäzer kem belän eş itäçägen açıqlawda problemaları bulaçaq", dip kisätä Serbiä parlamentındağı qalğan partiälärne serb millätçese Tomislav Nikoliç.

Reformaçıl partiälärne çınnan da qatlawlı söyläşülär kötä. Prezident Boris Tadiçneñ nigezdä Könbatışqa qarağan Demokratik partiäse qazanğan tawışlar sanı yağınnan ikençe urında, anıñ älegä qädär mondıy uñışqa ireşkäne yuq ide. Tadiç xäzer premyer-ministr Vojislav Koştunicanıñ öçençe urında kilgän Serbiä Demokratik Partiäse belän yaña ber berektäşlek qorırğa tırışaçaq dip kötelä.

Radiobıznıñ Balkan belgeçe Patrick Moore mömkin berektäşleklärne bolayraq kürä:

"Tadiçneñ Demokratik partiäsen, Koştunicanıñ Serbiä Demokratik Partiäsen, häm alarğa G17 törkemendäge liberallarnı da bergä quşqanda parlamenttağı 250 mandatnıñ 132-se alarda bulaçaq. Moña äle bälkem dä reformaçıl liberal demokratlarnıñ 14 urının häm milli azçılıqlarnıñ 7 deputatın da östäp bula. Bolarnıñ barısın da bergä cıyıp bulsa, bu şaqtıy uñay küpçelek bula ala", di Balkan belgeçe Patrick Moore.

Ämma zur ber soraw bulıp, bar şuşı sanap kitelgän partiälär berläşü maqsatında üzara qarşılıqların artta qaldıra alırmı, şul tora. Şäxsi ölkädä Tadiç belän Koştunica arasında inde küptännän köndäşlek bara.

Kärim Kamal
XS
SM
MD
LG