Accessibility links

сишәмбе, 6 декабрь 2016, Казан вакыты 21:07

Merkel belän Putin xezmättäşlekne nığıtırğa kileşte


Yäkşämbedä Rusiä prezidentı Vladimir Putin Soçi utırmasında Germaniä kanslerı Angela Merkel belän oçraştı. Söyläşülär üzägendä, aldan kötelgänçä, energetika mäsäläse tordı.

Angela Merkel Soçiğa Germaniä kanslerı bularaq qına kilmäde. Yıl başınnan anıñ ile Yewropa Berlege häm Zur 8-lektä räislek itä. İke säğät barğan söyläşülärdä törle mäsälälär tikşerelde, läkin töp iğtibar energetikağa birelde. Küptän tügel Belarus belän bulğan bäxäse waqıtında Rusiä Yewropağa neft cibärüeñ tuqtatıp torğan ide. Mäskäwneñ mondıy adımğa aldan kisätmiçä baruına Merkel Yewropa Berlege isemennän qänäğätsezlek citkerde.

"Bezgä ışanıçlı mönäsäbätlär kiräk, hiç yuğı energiä belän täemin itü ölkäsendä. Şuña kürä kiläçäktä mondıy awırlıqlar tuğanda kiñäşep eşlärgä kiräk" dide Germaniä kanslerı.

Vladimir Putin Rusiä Yewropa illären neft häm gaz belän özleksez täemin itergä teli, läkin yağulıq Yewropağa Ukraina häm Belarus aşa quıla dide häm soñğı krizislar öçen şuşı ike ilne ğäyepläde:

"Bez tranzit illär belän xezmättäşlek itergä telibez, härkem öçen açıq häm urtaq prinsiplar nigezendä. Şuña kürä bez partnerlıq, xezmättäşlekkä – äye, parazitlaşuğa – yuq dibez" di Rusiä prezidentı.

Putin Yewropağa taba yaña ütkärgeç suzu eşen tizäytergä wäğdä itte.

Kön tärtibendä torğan tağın ber soraw – Yewropa Berlege belän Rusiä arasında xezmättäşlek kileşüen yañartu mäsäläse ide. Elekke kileşüneñ möddäte Noyäberdä çığa. Yaña kileşü xaqında söyläşülär uzğan yıl başlanası ide. Läkin Polşa, Rusiäneñ bu ildän it kertüne tıyuına cawap itep, söyläşülärgä veto salğan ide.

Merkel Yewropa Berlege belän Rusiä arasındağı qarşılıqlar xäl itmäslek tügel, bügenge söyläşülär bik yaxşı ütte, yaña kileşü yünäleşendä dä eş däwam itäçäk dide.

Putin, bu mäsälägä qarata kinayalı süzlär saylap, "äydägez şulay kileşik – bez kileşügä qarşı tügel" digän añlatma belän çiklände.

İrannıñ atom programına kilgändä, taraflar urtaq qaraş tapqan dielde, läkin oçraşudan soñ Putin bu mäsälä fäqät säyäsi häm diplomatik yullar belän xäl itelergä tieş dide.

Serbiäneñ Kosovo töbägenä qağılıp Putin, bu täbäkneñ statusı turındağı qarar Serbiäne dä Kosovonı da qänäğätländererlek bulırğa tieş dide.

Ali Ğilmi
XS
SM
MD
LG