Accessibility links

шимбә, 10 декабрь 2016, Казан вакыты 23:28

“Neçkäbil” bäygesendä qatnaşuçılar arta


“Neçkäbil-2007” güzäl xatın-qızlar bäygeseneñ başlanuı turında bez berniqädär mäğlümat birgän idek. Bu respublikada xatın-qızlar arasında alıp barıla torğan bäyge, bıyıl dürtençe märtäbä oyıştırılaçaq. Anda yıldan-yıl kübräk xatın qızlar qatnaşa. Qazan şähärendä tuğan bu bäyge bıyıl tağın da zurraq masştabta oyıştırıla. Sişämbe könne “Neçkäbil” bäygesen oyıştıruçılar respublikanıñ “Tatmedia” agentlığında matbuğat oçraşuı uzdırdılar. Anda bu bäygeneñ proyekt citäkçeläre häm respublikanıñ eşmäkärlek agentlığı wäkilläre , profsoyuzlar federatsiäse räise häm Qazandağı Şvetsiäneñ “Mega” säwdä üzäge wäkile dä häm başqa oyıştıruçılar da qatnaştı.

Matbuğat oçraşuında “Neçkäbil ”bäygeseneñ proyekt citäkçese İzol'da Juykova äytüençä, bıyıl bu bäygedä qatnaşırğa teläwçelär arasında bik küp törle hönärle xatın-qızlar bar. Alarnı berläştergän närsä soñ ?- digän sorawğa ul alarnıñ barsın da xatın-qızğa xas bulğan güzällek, maturlıq, ana bulu, ğailädä bäxetle bulğan xatın- qızlarnıñ tağın närsägäder öyränergä teläk belderüläre, häm dä härçaq matur bulu häm yaqınnarına oşarğa teläw xisläre dip bilgeläp uzdı. Bäygedä ciñüçelärgä yöklänelä xäyriä eşe belän şöğellänü. Menä şuşındıy sıyfatlı, cawaplılıq häm ciñü teläge bulğan, bıyılğı xäyriä yılında balalar , invalidlar yortlarına barıp keşelärgä cılılıq birerlek xanımnar cıyılğan. Alar arasında küp balalı analar da bar.

Bäygedä qatnaşırğa tüläwçelär respublikanıñ törle cirlärennän. Bıyıl xätta Rusiäneñ Petropavlovskiy şähärennän şıltıratqannar. Alar üzlärendä ütkärergä teläp, bezdän röxsät sorıylar , ämma bäygeneñ nigeznamäse buyınça bu bäygedä tik Tatarstan respublikasında yäşäwçe xatın -qızlar ğına qatnaşa ala, - dide İzol'da Juykova.

Älbättä, bu yünäleştä bezgä ximayäçelär yärdäm kürsätä, alar bulmasa, bez üzebez genä başqarıp çığara almas idek, - dide ul.

Profsoyuzlar federatsiäse räise Tat'yana Vodop'yanova da üzeneñ çığışında bäygeneñ bıyılğı üzençälege turında söyläde.

Törle hönärle xatın qızlarnıñ qatnaşuı alarnı şatlandıruı turında äytte . Çönki alar arasında zıyalılar, yäğni uqıtuçılar, tabiplar, fänni xezmätkärlär dä häm konduktorlar da, eşmäkärlär, zavod eşçeläre, profsoyuz xezmätkärläre dä qatnaşuı turında söyläp ütte ul. Häm alar arasında ni öçen qatnaşırğa teliseñ digän sorawğa, alarnıñ, “ Möselman xatın qızlarınıñ ğailädä yäşäw räweşen kürsätäsem kilä” – digän fikerlären citkerde.

“Neçkäbil-2007”dip isemlängän güzäl xatın-qızlar bäygeseneñ yarım finalı Qazandağı “Mega”sәwdә üzägendä bu atnanıñ şimbäsendä, yäğni 27 ğinwarda uzaçaq.

Qazandağı “Mega” säüdä üzägeneñ eçendäge “Ğailä” säwdä üzäge citäkçese urınbasarı häm bu üzäkneñ menedjerı Yonus Berg bu bäygedä ni öçen qatnaşırğa teläk belderüläre turında bolay dide:

“Bezneñ maqsatlar bik oxşaş, ğailä tormışınıñ qimmätläre bezneñ öçen dä bik möhim , şunıñ öçen dä bez bik şat bu bäygedä qatnaşırğa” dide ul.

Ssenariy citäkçese Vladimir Bibişev häm bäyge rejisserı Anna Prazdnikovalar bıyılğı finalda nindi yañalıqlar kertüläre belän urtaqlaştılar . Anda finalğa çıqqan xatın-qızlarğa xätta , klassika cırların başqarırğa yärdämgä Lа Primavera orkestrı da yärdämgä kiläçäk ikän.

Ä “Mega” säwdä üzägendä 27 ğinwarda uzaçaq yarım finalda 50 xatın -qız östäl tutırıp äzerlägän tämle- tämle rizıqlarnı awız itärgä dä bulaçaq. Şular arasınnan jyuri äğzaları 15 xatın-qıznı finalğa saylap alırğa tieş bulalar.

Mälikä Basıyr

XS
SM
MD
LG