Accessibility links

дүшәмбе, 5 декабрь 2016, Казан вакыты 07:36

Dinnär tarixın kemnär uqıtırğa tieş?


“Tügäräk östälne Tatarstan Ministrlar Kabinetı qarşındağı Din eşläre Şurası citäkçese Renat Näbiev alıp bardı. Moña qädär mondıy urtaq fiker alışular Tatarstanda äle uzdırılğanı yuq ide. Barı Rusiä töbäklärendä “Pravoslaw mädäniäte nigezläre” uqıtıla başlawğa borçılu belderülärne genä buldı. Küräseñ, mäktäplärdä din uqıtu inde şaqtıy köçle räweştä ütep kerep bara. Älege “tügäräk östäl”neñ maqsatı turında Tatarstan Ministrlar Kabinetı qarşındağı Din eşläre Şurası citäkçese Renat Näbiev:

Dinnärne uqıtuda kemnärder alğa kitte, yäğni pravoslaw mädäniäte nigezläre inde uqıtıla. Bu bilgele borçular da tudırdı. Ämma añlaşu tabu öçen fiker alışular kiräk. Älege “tügäräk östäl” dä şul nisbättän oyıştırıldı. Kiläçäktä bu yunäleştä ber fikergä kilerbez dip uylıym.

Renat Näbiev belderüençä, xäzer mäktäplärdä dinne öyrätü nindi metodika belän alıp barıluın, anı kem uqıtırğa tieşlege qızıqsınu tudıra. Soñğı waqıtta dinnär nigezlären uqıta başlaw ölkäsendä törle däresleklär dä çığa başladı. Tatarstanda uqıtılır öçen äzerlängän uqu äsbabı belän Tatarstan Prezidentı Mintimer Şäymiev tä tanışqan ide häm ul küptän tügel jurnalistlar belän oçraşu waqıtında däreslekne xupladı. Bu xaqta Tatarstan mäğärif häm fän ministrlınıñ milli mäğärifne üsterü bülege citäkçese Raif Zinnätullin:

Däreslekne xäzer tikşerü bara. Yaña tözätmälär kergäç ul qabul iteläçäk.

Raif Zinnätullin belderüençä, älege däreslek Tatarstan öçen genä dip tözelsä inde qayber Rusiä töbäklärennän dä qızıqsınu belderä başlağannar häm şundıy äsbap çıqsa bezgä dä täqdim itärsez digän süzlär bulğan.

“Tügäräk östäl”dä isä törle din wäkilläre qatnaştı. Tatarstan möselmannarı Diniä Näzaräteneñ uqu-uqıtu öçen cawaplı bulğan Rifqät Nasıybullin bezneñ inde dini belem birü sisteması tözelgän dip bilgeläp uzdı. Ul dini yuğarı häm urta dini belem birü uqu yortları barlığına basım yasadı. Pravoslaw dine wäkile – Qazan seminariäse citäkçese İoann Barsukov isä dinnärne uqıtu kiräk häm anıñ belän TR Mäğärif häm fän ministrlığı şöğellänergä tieş dip belderde. İoann Barsukov:

Bu bik qatlawlı mäs'älä. Monıñ belän TR Mäğärif häm fän ministrlığı şöğellänergä tieş. Ber qurqınıç bar: dinnärne uqıtu dip sektalarnıñ mäktäplärgä ütep kerüe

Tügäräk östäldä qatnaşqan ğalimnär isä uquçılarnı hiç kenä dä din wäkilläre uqıtırğa tieş tügel dip assızıqladılar. Monıñ öçen maxsus äzerlekle yuğarı belemle uqıtuçılar kiräklege äytelde. Mäsälän, Qazan däwlät universitetınıñ dinnärğä kereş fäne bülege citäkçese Valeriy Korolev däres birergä ber tapqır din wäkilen çaqıruların häm studentlar anıñ däresen yaratmawın äytte. Ğomumän, “tügäräk östäl”dä urtaq fikergä kilü bulmadı. Küplärne dinnärne uqıtuda üget-näsıyxät bulmasqa tieş dip assızıqladılar.

Landış Xarrasova

XS
SM
MD
LG