Accessibility links

пәнҗешәмбе, 8 декабрь 2016, Казан вакыты 17:24

“Kamaz”ğa köndäşlär arta


Qarşıñnan qara mäçe yögerep uzsa, barlıq eşeñ kiregä bulır dilär. Berniçä yıl rättän törle xalıqara yarışlarda ciñü yaulap, “Kamaz Master” komandası Tatarstan maşinasın dönyağa tanıttı. 2006 yılda Kamaz yıllıq tovar äyläneşen 60 milliardqa kütärep, 45 meñgä yaqın maşina çığarğan. Alarnıñ 11 meñeçit ilgä kitkän. Läkin 2007 yıl başınnan Tatarstan maşinasına iğtibar kimi. Rallida da beznekelärgä ikençe urın ğına eläkte. Östäwenä Tatarstannıñ yök maşinalar bazarında Kamazğa tiñdäşlär bulırğa tora.

Respublikada küp kompaniälär çit il yök maşinaların saylağanğa kürä, Volvo häm Man kompaniäläre fevraldä beryulı ike remontlau stansiälären açırğa niätli. “Ser Avto” yabıq aksionerlıq cämğiäte general direktorı Aleksandr Şavkeviç äytüençä, täwge Volvo üzäge 1 fevraldä açılaçaq. Ul Qazan-Ufa-Mäskäw yulında Qazanğa kergändä urnaşqan. 2006 yılnıñ közendä bu yulda yök maşinaları buyınça barı tik ber Kamaz remontlau üzäge genä bulsa, xäzer alar kübäyäçäk. Härber stansiä 4 million dollar dip bäyälänä. Anıñ qarawı, Kamaz bu eşkä ni barı 75 million sarıf itkän. Çiti il maşinası üzäkläre täwlegenä 20 maşinağa xätle tözekländerergä niätli. Maşina qaraw üzägeneñ ğomumi mäydanı 2,5 gektar. Älege stansiälär “Volvo-Vostok” oyışması belän kileşü tözelgän, şunlıqtan alar bu kompaniäneñ Tatarstandağı ofitsial'' dillerları xoquqında eş itä. Älege üzäklärne tözüdä Volvo kompaniäse bernindi çığımnar kürsätmi. Alar fäqät Tatarstan eşmäkärläre tarafınnan salına.

Şulay uq, Qazan-Ufa-Mäskäw yulında “MAZ-MAN” çit il maşinaların citeşterüçe oyışmasınıñ üzäge dä tözelep kilä.

Şunı äytergä kiräk, bügenge köngä qädär, çit il yök maşinası xucalarına üzläreneñ timer atların tözekländerergä dip, Mäskäw yäki Tübän Novgorodqa barırğa turı kilgän.

Ciñel maşina bazarında sıman, yök maşinaları arasında da tizdän köçle köräş başlanaçaq. Çit il transportına qarşı torğan Kamaz üze dä ozaqlamıy, çit ilnekenä äylänmägäye. Küptän tügel Avstriäneñ Wadko Austria GmbH oyışması belän Kamaz arasında kileşü tözelgän. Tatarstan oyışması üz maşinalarına çit ildän cihazlar satıp alaçaq.

Bügen Qazan-Ufa-Mäskäw yulınnan täwlegenä 2000 tiräse yök maşinası ütä.

Dimäk bu çirdä tözekländerü üzäklärenä soraw bar. Ä soraw bulğan cirdä härçaq köndäşlek bara. Volvo belän MAN üzäge citäkçeläre, üzläreneñ eşläre uñışlı buluında şiklänmi. Alarnıñ ömetläre aqlansa, Tatarstan Kamazına ciñel bulmayaçaq.

Ğädel Galämetdinov

XS
SM
MD
LG