Accessibility links

Кайнар хәбәр

Fäqir ildä fatirnı qayan alırğa?


Xäzer yortlar salu kiñäysä dä, ğadi keşegä fatir satıp alu bik qıyın. Xätta toraq tözü ilküläm milli proyekt buyınça alıp barılsa da. Östämä çaralar häm mömkinleklär töbäklärdän häm citäkçe kadrlardan tora. Menä şul turıda küptän tügel Qazanda Rusiä prezidentı qarşındağı Däwlät Sovetı prezidiumı utırışında süz bardı. Tatarstan täcribäse häm M.Şäymiev citäklägän törkem täqdimnäre isäpkä alına. Ämma barıber ilküläm proyektlar xalıq öçen möhim bulıp, däwlätneñ östenlekle yunäleşe itep iğlan itelsä dä, xällär tiz genä uñay yaqqa üzgärmi. Käğäzdä yazılğan zur aqçalar keşelärneñ mul tormışın tä'min itkänçe, zur yullar häm küp waqıtlar ütä.

Älege proyektlar xalıq tormışınıñ dürt möhim tarmağın üz eçenä aldı - sälämätlek saqlaw, mäğärif, toraq häm awıl xucalığı. Uzğan yılda bu tarmaqlarda uñay üzgäreşlär inde tormışqa aşa da başladı. Mäsälän, Tatarstanda toraq tözü, xalıqnı toraqlı itü şaqtıy alğa kitte. Respublikanıñ bu ölkäsendä uñışları Mäskäwdä dä qızıqsınu uyattı. Tatarstanda ipoteka buyınça fatir alu öçen 15 meñnän artıq keşe Däwlät toraq fondı belän kileşü tözegän. Äle 25 meñe çiratta tora. İlküläm proyektınıñ töp maqsatı isä ğadi keşe alırlıq toraq tözü. Ämma älegä qädär toraq alu bik awır. Bu xaqta belgeçlär fikeren tıñlap kitik. Sotsiologiä fännäre doktorı, professor Ämir Gıylmanov söyli:

Tatarstan toraq tözü buyınça alda bara. Menä ul toraqnı niçek alırğa xäzer? Menä, mäsälän, yäş ğailä. Ul fatirnı satıp alırğa aqçaları bulsa bik äybät tä bit. Ä menä ğadi genä qız häm yeget öyläneştelär. Alarğa ipoteka buyınça da fatirnı berkem dä birmäyäçäk. Çönki berse ala 3мең, ikençese 5-6 meñ.

İlküläm proyektlar sälämätlek saqlaw tarmağına da üzgäreşlär kiterde. Qayber tabiplarğa, şäfqät tutaşlarına xezmät xaqı arttırıldı, meditsina oyışmalarına yaña cihazlar alındı. Ämma sälämätlek saqlaw ölkäsendä çişäse problemalarnıñ äle oçı-qırıyı kürenmi. Nigezdä meditsina xezmätkärläreneñ tir tügep alğan xezmät xaqları tübän qala. Bu isä awırularnı däwalaw sıyfatında çağıla.

Qazanda Rusiä prezidentı qarşındağı Däwlät Sovetı prezidiumı utırışında Rusiäneñ finans ministrı Aleksey Kudrin oçsızlı toraqlar tözügä aqça citmäyäçäk, çönki bulğan aqçalar yul tözügä bülenä dip küplärneñ küñellären yaralağan ide. Xätta Vladimir Putin taqır yullar buylap äybät mersedeslarda cilderüçelär häm cimerek baraklarda yäşäwçe fäqirlär barlığın iskä alğan ide. Monı televideniedä kürgän häm işetkän keşelär bötenläy qawşap qaldı. Çönki bu döres süzlär. Xätta yullar tözelsä dä, sotsial' tormış elekkeçä qalırğa mömkin. Rusiä prezidentı belän bu yulı berkem dä bäxäsläşmäde. Ämma ğämäldä kemneñ qararı iñ soñğısı bulır - xäzergä bilgesez.

Al'bina Zäynulla

XS
SM
MD
LG