Accessibility links

дүшәмбе, 5 декабрь 2016, Казан вакыты 05:35

İjawda öçençe mäçet tözelä


Rossiädä süz ireklege birelgäç tä, qanunnarda elek deklarativ räweştä birelgän xoquqlar da tormışqa aşırıla başlandı. Elek mäçetlärne cimerü turındağı ämerlär yuqqa çığıp, yaña ğibädät binaları tözü xoquqı birelde. Monıñ belän möselmannar bik teläp qullana. Soñğı yıllarda ğına Udmurtiädä yañadan tözelgän mäçetlär sanı yegermedän arttı. Udmurtiä Respublikası başqalası İjawda ğına un yıl eçendä möselmannar öçençe ğibädät binasın sala başladı. Berençese - Azina uramında urnaşqan Cämiğ mäçete. Ul un yıl elek açılıp, küplägän din qärdäşlärebez öçen ğibädät qılu urını ğına tügel, dini sabaqlar alu, möselmannarğa aralaşu urını da bulıp tora.

İjaw şähäre üzägendä ike yıl elek tağın ber mäçet tözeleşe başlandı. İnde Udmurtiä başqalası İjaw şähäreneñ Ustinov rayonında yäşäwçe möselmannarnıñ da xıyalı- mäçetle bulu teläge - tormışqa aşaçaq. 2007 yılnıñ cäy aylarında bu mäçet inde safqa basaçaq. Mäçet buldırunı başlap yörüçe Änisä xanım Zakirova tözeleştäge üzgäreşlärne küzätep, söyenep betä almıym dip assızıqladı.

Dörestän dä, tözeleş eşlären alıp baruçı, «Al'famonolit» firması direktorı yärdämçese Şamil Axmadullin mäçetne proyekttan qaralğannan aldan tögällärgä niätläp torabız dip belderde. Dörestän dä, biredä eşlär zur tempta alıp barıla. Mäçetne töreklär citeşterä. Tözeleş mäydanındağı üzgäreşlär küzgä kürenep üsä. Şuña da Änisä xanım Zakirova moña bik şat.

Mäçet tözeleşen Udmurtiä diniä nazäräte täqdime buyınça respublikanıñ milli-mädäni möxtäriäte üz küzätüe astında tota. Möxtäriätneñ räise İrek Şäripov äytüençä, mäçet tözüne başlap yörüçelär bu töbäktäge xatın-qızlar. Bolarnı iskä alıp, aña änilär mäçete digän isem birergä digän qararğa kilgännär.

Yaña ğibädät binasına änilär mäçete iseme birelüen din qärdäşlärebez xuplap qarşı alğan. Kiläçäktä biredä onıqları da islam dine nigezlären öyränep, dini yolalarıbıznı däwam itär dip ışana ölkännär.

Mäçet zur bulmayaçaq. Anda 150 lәp din qärdäşlärebez irkenläp ğibädät qıla alaçaq. Mäçet tözeleşä törle oyışmalar da, din qärdäşlärebez dä qulınnan kilgänçä yärdäm itä, dip urtaqlaştı Änisä xanım Zakirova.

Xämidä Ğayfullina, Udmurtiä

XS
SM
MD
LG