Accessibility links

җомга, 9 декабрь 2016, Казан вакыты 22:24

BMOnıñ maxsus wäkile üzeneñ Kosovo täqdime belän tanıştıra başladı


Berläşkän Millätlärneñ Kosovo öçen maxsus wäkile Martti Ahtisaari comğa könne 6 ildän torğan "elemtä törkeme"nä şuşı töbäkneñ kiläçägen niçek bilgeläwne küz aldında totqan täqdimnären citkerde. Bu täqdimnär älegä kiñ cämäğätçelekkä bilgele tügel, Ahtisaari "elemtä törkeme" wäkilläre belän Venada yäşeren ber urında oçraştı. Şuña da qaramastan, täqdimnärneñ nindiräk bula aluı xaqında inde elegräk tä xäbärlär bar ide.

Britaniä, Fransiä, Germaniä, İtaliä, Rusiä häm Quşma Ştatlar wäkillärennän torğan maxsus "elemtä törkeme" belän Martti Ahtisaari çınnan da yäşeren urında oçraştı. Ä aña qädär ul 9 ay buyı almaş-tilmäş Serbiä häm Kosovo albannarı citäkçeläre belän oçraşıp, şuşı bäxäsle töbäkneñ kiläçägen här ike yaqqa da yararlı itep bilgeläw yulların ezlägän ide.

Ämma serblarnıñ häm albannarnıñ Kosovonı niçek itep kürüe şul xätle ayırıla ki, Ahtisaarineñ ike arada yörüe ällä ni zur näticälärgä kitermäde diärgä bula. Kosovo xalqınıñ 90 protsentın täşkil itkän albannar töbäkneñ Serbiädän ayırıluın häm bäysezlek iğlan itüen teli, ä andağı serblar häm bigräk tä Belgradtağı üzäk xökümät iñ kübe Kosovoğa mömkin qädär kiñ moxtariät birep anıñ serb däwläte eçendä qaluın taläp itä.

Älegä Kosovo xalıqara idarä astında, ul anda 1999-nçı yılda kertelgän ide. Ämma bu xäl anda mäñge däwam itä almıy häm töbäkneñ kiläçägen niçek tä bulsa bilgeläw kiräk.

Ahtisaari oçraşuınıñ yabıq işeklär artında ütüe säbäple, bu waqiğä turında mäğlümät çaralarına ayırım xäbär birelmäde. Ämma çärşämbedä BMOnıñ maxsus wäkile Strasbourgta Yewropa Şurasınıñ Parlament mäclesendä çığış yasağan ide. Kosovo yazmışına qarağan yaqınça nindi täqdimnär äzerlänüe xaqında Ahtisaari anda bolay dide:

"Minem täqdimnär ike yaq belän dä söyläşülärneñ näticälären iskä ala, ä inde urtaq kileşügä ireşelmägän ölkälärdä min üzem ğadel häm sallı dip tapqan çişeleşne täqdim itäçäkmen. Minem çişeleş täqdime üzägendä azçılıq xoquqların yaqlaw tora. Ul şulay uq demokratik, küpmillätle, här keşeseneñ xoquqları wä mänfäğätläre nıq itep garantiälängän, qanun xakimiätenä qorılğan institutlar tarafınnan yaqlanğan Kosovoğa nigez saluğa yul aça", dip añlatqan ide çärşämbedä Martti Ahtisaari, Berläşkän Millätlärneñ Kosovo öçen maxsus wäkile.

Şul çığışında Ahtisaari Kosovonıñ kiläçäktä bäysez bulu-bulmawın äytmäde, ämma älegä qädär kürengän xäbärlärgä qarağanda, ul kübräk töbäkneñ çiklängän bulsa da, ämma nindider ber däwlätçelek bulu yağına awışa.

Şuşı atna başındaraq Germaniä tışqı eşlär ministrınıñ urınbasarı Erler BMO wäkileneñ täqdimendä Kosovonıñ bäysezlege, ämma anıñ suverenlığı beraz çiklängän buluı yaqlanaçaq, digän ide.

Kiñ cämäğätçelekkä Ahtisaarineñ Kosovo kiläçägenä qarağan täqdime tağın ber atnadan soñ, 2-nçe fivral''dä mäğlüm bulaçaq, şul könne ul alarnı räsmi töstä Serbiä häm Kosovo wäkillärenä tapşıraçaq. Şunnan soñ inde eşneñ iñ awır öleşe başlana - BMO wäkile täqdimenä üz fatixasın İminlek Şurası birergä tieş bulaçaq. Ä anıñ daimi äğzalarınnan berse, Rusiä, Serbiäneñ tarixi berektäşe, Kosovoğa bäysezlek birüne küz aldında totqan teläsä nindi täqdimne kire qağaçağın äytep quyğan ide.

Kärim Kamal
XS
SM
MD
LG