Accessibility links

шимбә, 10 декабрь 2016, Казан вакыты 13:47

Omskida xacilar xörmätenä mäcles


Mäkkägä Xac qılırğa Omskidan bıyıl 13 keşe bardı. Uzğan atnada alar bu säfärdän isän-imin äylänep qayttılar. Comğa könne Xäyer-İxsan mäçetendä xacilar xörmätenä Qor'än aşı ütkärelde. Mäcleskä ike meñgä yaqın möselman cıyılğan ide. Şunsı iğtibarğa layık, anda ölkäneñ Tavriçanqa, Mosqalenqo, Tara, Sedel'nikovo rayonnarınnan häm xätta ölkä üzägennän 500 çaqrımlap yıraqlıqta bulğan Tevrizdan da möselmannar kilgän idelär. Xacilar xalıqqa täfsilläp xac qılu räweşe turında söylädelär, üzläreneñ anda tuğan xisläre belän urtaqlaştılar.

Xacda bulıp qaytqan Azat xaci häm Ğayşä xaciä Kurmanovlar, xacda baruları belän çiksez bäxetle buluları turında belderdelär, küñelem belän äle dä andamın dide Ğayşä xaciä, küz yäşläre aşa. Çığışlardan soñ Omski möxtäsibe Anwärbek xaci Cunıysov wäğäz söyläde häm bu könnärdä Tatarstan prezidentı Mintimer Şäymiewnıñ 70 yıllıq yubileyı bilgelänüe turında iğlan itte, anıñ adresına küp kenä cılı süzlär yulladı, andıy keşelär dönya totqası digän süzlär äytte.

Annan soñ xacilar xalıqnı zäm-zäm suınnan awız itterdelär häm aş östälenä çaqırdılar. Rizıq muldan äzerlängän, mäcleskä kilgän bar keşegä dä citärlek ide. Aştan soñ xacilar belän irekle aralaşu bardı. Min Xac qılıp qaytqan Äxtäm abıy Şäripov belän äñgämä qordım. “Bolay da ışana idem, anda barıp dinebezneñ döres ikänenä nıqlap inanıp qayttım, şunıñ belän bäxetlemen,”- dide 67 yäşlek Äxtäm abıy.

Rozaliä Sayganova, Omski

XS
SM
MD
LG