Accessibility links

якшәмбе, 11 декабрь 2016, Казан вакыты 07:15

Washingtonda distälägän meñ keşe Ğiraqtan ğäskär cıçağırğa taläp itte


Şimbä kön AQŞ başqalasında amerikan ğäskärlären Ğiraqtan çığarırğa taläp itkän demonstratsiädä distälägän meñ keşe qatnaştı. Washington uramnarına John Lennonnıñ "Tınıçlıqqa forsat bir" digän cırı 4 distä yıldan soñ kire qayttı. 1960nçı yıllarda bu cır Vietnam suğışına qarşı çaralarda başqarıla ide.

Çarada qatnaşuçılar Kongress binası aldına cıyılıp prezident Bushnıñ Ğiraq säyäsätenä tänqit belderde, Kongressnı suğışqa aqça birüne tuqtatırğa çaqırdı. Amerikan bayrağına törelgän yasalma tabutlar kütärgän keşelär "Xärbilärebezne qaytarığız" digän şiğärlär qıçqırdılar. Suğış veterannarı xalıqqa möräcäğät itte.

"Anda käyeflär üzgärä. Häm bu Kongressmennar ber kön uyanıp Ğiraqta xälneñ naçar ikänen üzläre añlağanğa tügel, monı alarğa sez citkeräsez. Ägär sez mine wäkillek itäsez ikän, monı tuqtatırğa waqıt, çönki bu eşlämi, bez ciñeldek, xärbilärne qaytarırğa waqıt, yuq isä bu mäğnäsez qan qoyuda alar tağı da kübräk üläçäk" di suğış verteranı.

Suğışqa qarşı protest çarasında küp kenä tanılğan keşelär qatnaştı. Aktrisa Jane Fondanıñ mondıy çaralarğa Vietnam suığışınnan bilre çıqqanı yuq ide. Bush xökümäten ul, üç aluçan, tübänçel administratsiä dip atadı. Qarşılıq çarasında Hollywood yoldızı Sean Penn da çığış yasadı:

"Bezneñ qayberlärebez qurqunıñ üzennän başqa bernidän dä qurıqmağan çaqlarnı xäterli. Xäzer bezneñ prezident ''saq bulığız, bu qurqınıç'' dip kisätä. Läkin bez qurıqmıybız. Häm bez aña añlataçaqbız, demokratiä şartlarında qarar qıluçı, ul - bez" di akter Sean Penn.

Ämmä amerikan prezidentı George Bush Ğiraqtan ğäskär çığarırğa äle irtä dip sanıy. Ğiraqqa östämä 20 meñnän artıq xärbi cibärü qararı turında comğa kön Aq Yortta ul boay dide:

"Kongressta min şunı añladım: anda küplär Ğiraqta ciñelü Quşma Ştatlar öçen qaza bulaçağın añlıy. Qarar qıluçı bularaq, min şuşı qazanı kisätergä tieş" dide amerikan prezidentı.

Kongress, suğışqa qarata tänqitçän qaraşta torsa da, älegä moña aqça birüne tuqtatırğa cörät itmi. Bügenge qarşılıq çarasında da berniçä genä kongressmen qatnaştı.

Ul arada Ğiraqta atnakiçtän birle tağın 7 amerikan xärbie häläk bulğan dip xäbär itelde. Şulay itep, 2003 yılnıñ martında Ğiraqqa basıp kergännän birle anda häläk bulğan amerikan xärbiläre sanı 3068-gä citte.

Ali Ğilmi
XS
SM
MD
LG