Accessibility links

якшәмбе, 4 декабрь 2016, Казан вакыты 05:11

Neçkäbil bäygeseneñ yarım finalı uzdı


Neçkäbil-2007 bäygeseneñ yarım finalı şimbä könne Mega säwdä üzägendä uzdı. Bäygeneñ bu öleşendä yäğni, yarım finalda, 44 xatın-qız qatnaştı. Anda qatnaşuçılar Qazannan ğına tügel, respublikanıñ törle zur şähärlärennän dä , rayon üzäklärennän dä häm, xätta awıllardan da kilgännär ide. Neçkäbil-2007 bäygeseneñ yarım finalı ğailä bäyräme qısalarında uzdı. Anda qatnaşqan xatın-qızlar üz ğailäläre häm alarğa yärdäm kürsätüçelär belän bergä aş-su äzerläwdä , qunaqlarnı sıylawda, häm şuşı Mega üzägendäge säxnädä, häm şuğalaqta üzläreneñ ostalıqların cırda , biüdä, süz ostalığı bäygesendä teatral'läşterelgän tamaşa kürsätep köç sınaştılar.

Xatın-qıznıñ güzällege, näfislege anıñ yözeneñ maturlığı häm üzeneñ niçek totışında ğına tügel , älbättä. Ğailädä ire öçen kürkäm xolıqlı söyekle xatın-qız, balaların yaratqan cılı qullı äni bula belü dä, xatın-qız öçen bik möhim närsä. Bäygene oyıştıruçılar tarafınnan bu şimbädä 44 xatın- qız arasınnan şuşı sıyfatlarğa iä bulğan iñ -iñ layıqlıların saylap alırğa kiräk ide.

Bäygedä qatnaşuçılarnıñ yartısınnan kübese Qazannan başqa, Tübän Kamadan, Älmättän, Çallıdan, Arçadan, Qama Alanınnan , Layış, Piträç, Saba , Tübän Qamanıñ rayon üzäklärennän genä tügel, xätta awıllarınnan da kilgännär ide. Alar arasında xisapçılar da , uqıtuçılar da, balalar tabipları da muzıka uqıtuçıları da rayon üzäklärendä xezmät kürsätüçe mädäniät xezmätkärläre dä bar ide.

Bäygedä qatnaşuçı xatın-qızlar bik zur ostalıqların kürsätep äzerlägän aş-su östälendäge rizıqlarnı härberseneñ tuğannarı, dusları jyuri äğzalarına, jurnalistlarğa da häm bäyrämne qararğa kilgän qunaqlarğa bu rizıqlarnı tämläp qararğa matur, üzençälekle itep täqdim ittelär. 44 östälgä äzerlängän rizıqlar arasında törle xalıq aşları: tatar, rus, ğäräp, yapon , qıtay, fransuz häm başqa bik küp törle xalıq aşları bar ide.

“tatar häm ğäräp aşlarınnan torğan östäl dä bar”.

Şämärdännän qatnaşuçı xatın-qıznıñ tuğannarı xätta östäldäge rizıqlar turında cırlar çığarıp Azatlıq radiosına da üzläreneñ sälämnären cibäräseläre kilde.

Ä soñınnan bar qatnaşuçı 44 xatın qız da üzläreneñ ostalıqların icadi bäygedä sınadılar. Anda alar ğailäläre belän bergä cırlar cırlap ta tamaşaçını tañ qaldırdılar, iyülläre belän dä şaqqattırdılar, “Ägärdä bala bulmağan bulsa…”digän temağa bağışlanğan ğailädäge konfliktlı mizgellärne çağıldırğan teatral'läşterelgän tamaşa belän dä tamaşaçını uylanırğa mäcbür ittelär.

Qazandağı Mega säwdä üzäge ğadi könnärdä dä xalıqnıñ monda küp buluı belän ayırılıp tora. Ä bu şimbädä xalıq ayıruça küp buldı. Ä sez qatnaşır idegezme bu bäygedä digän sorawğa bäygene qararğa kilgän tamaşaçılardan cawaplar törle buldı. Kemder: qatnaşır idek tä alar kebek qıyu tügelbez, kemder älege ğailädä balaları yuqlığı belän añlattı, ä kemder, köç cıyıp aldağı yılda qatnaşırğa telägen belderde.

Tamaşa zalı zur bulmaw säbäple , bäygene basıp qarap, aru säbäple, qänäğät bulmıyça kitüçelär dä buldı.

Şimbä könne bäygedä qatnaşuçılarnıñ 16 xatın-qızı ciñep çıqtı häm alar anda finalda köç sınaşaçaqlar. Bäygeneñ finalı mart urtalarında “Piramida” mädäni üzägendä oyıştırılaçaq.

Mälikä Basıyr

XS
SM
MD
LG