Accessibility links

сишәмбе, 6 декабрь 2016, Казан вакыты 05:57

Ermitaj citäkçese Qazanda at kürgäzmäsen açtı


Qazanda törle qızıqlı kürgäzmälär bik yış bulıp tora. Läkin ayıruça zur iğtibarnı älbättä, Qazanda uzğan yılda açılğan Ermitaj üzägendä oyıştırıla torğannarı cälep itä. Çönki anda iñ zur häm bay muzeylarnıñ berse bulğan Ermitajdan kilgän äyberlär kürsätelä. Üzäk açılğannan birle Qazanda inde ike kürgäzmä eşläde. 26 ğinwarda isä üzäktä çirattağı kürgäzmä açıldı. Ul atqa bağışlanğan. Anda törle xalıqlar, sivilizatsiälär, çorlarğa bäyle eksponatlar yärdämendä atnıñ keşegä xezmät itü tarixı taswirlana. Şulay uq monda at obrazın äkiätlärdä häm miflarda çağıldırğan materiallar da urnaştırılğan. Kürgäzmäne açu tantanasına Ermitaj muzeyınıñ citäkçese Mixail Piotrovskiy üze kilde. 600dan artıq bersennän-berse qızıqlı eksponatlardan torğan älege kürgäzmä xaqında ul menä närsälär äytte.

Kürgäzmä bik qızıqlı, bez üzebez dä aña soqlanabız. Monda skiflarnıñ altın äyberläre dä, seber xalıqlarınıñ atlı bizäklär ürnäkläre, rus patşaları Yekaterina häm Petr I neñ iärläre, Rastrelli tarafınnan ağaçtan eşlänelgän at başı sını häm başqa siräk häm unikal’ äyberlär. Min bu kürgäzmä keşelärgä oşar dip ömetlänäm, bigräk tä yäş tatarstanlılarğa

Älege kürgäzmäneñ Tatarstanda oyıştırıluı oçraqlı tügel. Bilgele bulğança, tatar xalqınıñ tormışında at bik ähämiätle urın alıp torğan. Atlarnı respublikanıñ prezidentı Mintimer Şäymiev tä bik yarata. Şuña da, anıñ älege kürgäzmäne açu tantanasına kilüe berkemne dä ğäcäpländermäde. Tantanada ul Qazanda Ermitaj üzäge açıluına Mixail Piotrovskiyğa räxmätlären belderde.

Rusiädä berençe bulıp Qazanda açılğan Ermitaj üzäge öçen bez Mixail Piotrovskiyğa räxmätle bulırğa tieş. Dönyada da Ermitajnıñ bülekçäläre barı tik Las-Vegas, Amsterdam häm Londonda ğına bar. Dimäk bez moña layıq häm bez monı saqlarğa tieşbez

Açılu tantanasınnan soñ, qunaqlar bergäläşep bik qızıqsınıp kürgäzmä belän tanıştı. Bu ekskursiäne alarğa Ermitaj muzeyı citäkçese Mixail Piotrovskiy üze ütkärde. Atqa bağışlanğan kürgäzmä belän Ermitaj üzägendä 23 sentäbergä qädär tanışırğa mömkin bulaçaq.

Gölnaz İlgizär

XS
SM
MD
LG