Accessibility links

шимбә, 10 декабрь 2016, Казан вакыты 15:59

Qazaqstanda Tatar bistäse saqlanıp qalırmı?


Düşämbe könne Qazanğa Qazaqstannıñ Astana şähäre aqimı Äskär Mamin citäkçelegendäge ber törkem wäkillär kilde. Alar Tatarstan başqalasındağı toraq tözeleşe, kommunal' ölkädäge täcribä belän urtaqlaştılar. Ğomumän, soñğı yıllarda Tatarstan belän Qazaqstan arasında här ölkädä xezmättäşlek arta bara. İke respublika prezidentları arasındağı duslıq ta moña etärgeç bulıp toradır. Bilgele bulğança, Könbatış Qazaqstanda Ğ.Tuqay muzee açılışında da M. Şäymiev häm Nursoltan Nazarbaev qatnaşırğa tieşlär ide. Läkin qayber säbäplär arqasında bu mömkin bulmadı. Şuña da qaramastan anıñ açılışında Tatarstannan barğan ber törkem wäkillär häm Qazaqstannıñ räsmi zatları qatnaştı. Älege muzey açılışı turında anıñ başlanğıçında yörgän ğalim Razaq Äbüzärov bu könnärdä kongressta uzğan oçraşu barışında söyläde.

Dekaberneñ 12сендә Könbatış Qazaqstanda Cayıq şähärendä Ğabdulla Tuqay muzee açıldı. Äytergä kiräk, moña äzerlek inde küptän bardı. Şul nisbättän Tuqayğa bağışlap Qazaqstanda 4 xalıqara konferensiä dä oyıştırıldı. Bu eşne Tuqay üzäge citäkçese ğalim Razaq Äbüzärov başlap yörde. Häm ul bu könnärdä Qazanda älege Xalıqara konferensiälärdäge çığışlar kergän “G. Tuqay icatı – Awraziä dönyası cimeşe” digän cıyentıygın da täqdim itte.

Razaq Äbüzärov G. Tuqay muzeen zur awırlıq belän açuları turında söyläde. Qazaqstandağı tatar eşmäkärläre yärdäm itä. Şähärdäge tatar cämäğätçelege öçen iñ qaderle urınnarnıñ berse Töxvätullinnar yortın zamanında Tuqay uqığan “Motıyğıya” mädräsäse tözekländerelep, anda “G.Tuqay muzey-yortı”n açalar. Anıñ açılışına Tatarstannan da qunaqlar bardı. Ämma iñ zur säfär cäy könne kötelä. Bu xaqta Tatar kongressında barğan utırışta ğalim Mirqasıym Ğosmanov:

Cäygä tatar bistäse belän tanışu öçen zurraq mömkinleklär bulaçaq. Tatar bistäsen qarap qaytu häm anı saqlaw öçen qayber möhim eşlär başqarılaçaq.

Utırışta äytelgänçä, tatar kongressı Qazaqstanğa baru öçen cäygä maxsus avtobus biräçäk. Könbatış Qazaqstan professorı Ğalim Razaq Äbüzärov 15-16 iyün könne zur Xalıqara konferensiä oyıştırılaçağın äytte. Äytergä kiräk, ul kübräk xäzer kilep tuğan mäs’älälärne xäl itü öçen ütä. Çönki xäzer Könbatış Qazaqstandağı Tatar bistäsen cimerü qurqınıçı kilep tuğan. Yäğni zur yortlar tözelep Tuqay ezläre yuğalırğa mömkin dip bilgelänä. Razaq Äbüzärov:

Xäzer Tatar bistäse iskitkeç matur. Ägär anda berär zur yort tözep quysalar anıñ yämlelege yuğalaçaq.

Razaq Äbüzärov xäzer Tatar bistäseneñ iskitkeç matur buluın assızıqladı. Häm anı saqlap qalu tatar xalqınıñ burıçı buluın äytte. Ämma qayber zıyalılar Qazaqstanda Tatarstan wäkillege bar häm älege eş belän näq alar şöğellänergä tieş dip sanıy.

Landış Xarrasova

XS
SM
MD
LG