Accessibility links

шимбә, 3 декабрь 2016, Казан вакыты 03:23

Ğiraq häm AQŞ xärbiläre Nacafta yözlägän ğisyançını yuq itkän


Ğiraq räsmiläre äytüençä, yäkşämbedä Ğiraq häm amerikan xärbiläre Nacaf qalası yanında bulğan bäreleşlärdä kimendä 200 ğisyançını yuq itkän. Räsmilär äytüenä qarağanda, bu ğisyançılar şiğilärneñ Aşura bäyräme waqıtında höcümnär başqarırğa cıyınğan.

Ğiraq räsmiläre monı zur ciñü dip atıy. Ğiraq armiäse belän bu qorallı törkem arasında bäreleşlär yäkşämbedä Nacafnıñ tönyaq bistäsendä başlanıp kitkän. Ğiraq xärbilärenä yärdämgä amerikan boralaqları kilgän. Ğiraq armiäse yağında yuğlatular az dielä - 3 xärbi häläk bulğan, 21e yaralanğan. Amerikan xärbiläre äytüençä, ber boralaq qazağa oçraw näticäsendä alarnıñ 2 xärbie häläk bulğan.

Nacaf xakime Ässad Äbü-Ciläl süzlärençä, törkem yaxşı qorallanğan bulğan, alarnıñ xättä hawa höcümenä qarşı raketaları bulğan. Ä menä kem ikännäre başta bilgesez ide.

Ğiraq xökümäte süzçese Ali Äl-Dabbağ, bu törkemne şiğilärneñ Cund Äs-Samaa, yağni Kük soldatları törkeme, dip atadı, anıñ süzlärençä, törkemneñ citäkçese şulay uq üterelgän.

Dubaidağı Farsı qultığı tikşerenü üzäge belgeçe Mostafa Alani süzlärençä, bu şiğilärneñ yaña törkeme bulıp tora:

"Bu şiğilärneñ yaña törkeme. Moña qädär Badr törkeme, Mähdi armiäse häm Däwa partiäseneñ xärbi qanatı bar ide. Döres bulsa, xäzer şiğilärneñ 4nçe törkeme barlıqqa kilde" di töbäk belgeçe.

Şuşı törkem şiğilärneñ soñğı imamı, Möxämmät äl-Mähdineñ isän buluına häm anıñ, keşeçelekne saqlap qalu öçen, ber könne qaytaçağına ınana. Qayber xäbärlärgä qarağanda, Ğiraqnı xäzerge citäkçelärdän tazartunı maqsat itep quyğan bu törkemdä sönnilär dä bar.

Nacaf xakime süzlärençä, bu törkem Aşura bäyräme waqıtında şiği citäkçelärgä qarşı höcüm äzerlägän bulğan. 10 kön elek şiği citäkçelär bu törkemneñ citäkçese Äxmät Xäsän Äl-Yamaninıñ Nacaftağı binasın yabıp quyğan bulğan.

Yuq itelgän suğışçılar sanına kilgändä, qayber küzätüçelär fikerençä, bu san küpertelgän bulırğa mömkin:

"Ğiraq räsmiläre 2003 yıldan birle barlığı 10 meñläp ğisyançı üterelgän, di. Minemçä bu döres san tügel. Terrorçılar, ğisyançılar arasında qorbannar sanın küpertep kürsätü inde ğädätkä kergän" di Dubaidağı Farsı qultığı tikşerenü üzäge belgeçe Mostafa Alani.

Yäkşämbedä Nacaf bäreleşendä qorban bulğannarnıñ sanı bäysez çığanaqlardan älegä raslanmağan.

Ul arada Karbala qalasında şiğilärneñ dini Aşura bäyräme belän bäyle çaralar başlandı. Çaralar 10 kön däwam itäçäk. Anda 2 million çaması şiği qatnaşır dip kötelä.

Ali Ğilmi
XS
SM
MD
LG