Accessibility links

якшәмбе, 4 декабрь 2016, Казан вакыты 23:31

Çallıda "Xizbut-Tahrir" eşe


Monnan berniçä yıl elek Tatarstanda ğına tügel, böten Rusiädä ığı-zığı tudırğan "Xizb-ut-Tahrir-Äl' İslamiä" oyışması qabat cämäğätçelek igtibarına mende. 2005 yılda qulğa alınğan şuşı oyışma äğzalärenä qarata 30 ğinwarda mäxkämä eşe başlandı. Ğayıplänüçelär 6 keşe häm alarğa Rusiä Federatsiäse cinayätlär kodeksınıñ 282 maddäneñ 2 öleşe buyınça ğayıpläw belderelä. Bu- ekstremistlar oyışması tözü eşçänlege belän bäyle maddä. Başlanğan mäxkämä eşe yabıq rejimda bara häm şähärneñ qaysı urınında baruı xaqında da köç-xoquq oyışmalarınnan mäğlümätlär alıp bulmadı. Härxäldä, "Azatlıq" xäbärçese Çallınıñ törle rayonnardağı berniçä mäxkämä binasında buldı häm "Xizbut Tahrir"ğa qarata başlanğan mäxkämäneñ qayda baruın belä almadı. İnde mäglüm bulğança, "İslam azatlığı firqäse" iseme astında eş yörtkän "Xizbut-Tahrir Äl' İslamiä" oyışması 2003 yılnıñ 14 fevralendä Rusiä Yuğarı mäxkämäse qararı belän terroristik oyışma dip iğlan itelä häm Rusiä territoriäsendä anıñ eşçänlege tıyıla. Çallı häm Tatarstan xoquq saqlaw xezmätläreneñ moñarçı bäyän itkän mäglümätläre buyınça, "Xizbut-Tahrir" oyışması wäkilläre respublikada üz eşlären 2003 yılda başlap cibärälär. Çallı, Älmät, Mamadış şähärlärendä, Aqtanış rayonında oyışmağa yaña äğzalär tuplaw belän şöğellänälär. Läkin 6 keşelek kenä törkem tuplana. Xoquq organnarı mäğlümätläre buyınça, 2005 yılda, "Xizbut-Tahrir" qulğa alular näticäsendä Tatarstanda eşçänlegen tuqtata. Qulğa alınuçılarnıñ berse yäşägän fatirdan bikford bawı häm zapal, yäğni şartlatu caylanması da tabılğan. "Xizbut-Tahrir" äğzaläre xalıq arasında listovkalar taratu belän dä şöğellängän digän mäğlümatlar bar. Älege listovkalarda İslam Xälifäte buldıru turında süz bara ikän. Qulğa alınğan, xäzer inde mäxkämä qarşına bastırılğan 6 keşeneñ 3се Üzbäkstanda, Tacikstanda häm Qırğızstanda tuıp üskännär. "Xizbut-Tahrir" eşe buyınça başlanğan mäxkämä qayçan üz süzen äyter, ber atnadanmı, 3 atnadan soñmı, älegä farazlap bulmıy.

Çallı, Ğafiulla Ğaziz

XS
SM
MD
LG