Accessibility links

якшәмбе, 11 декабрь 2016, Казан вакыты 15:00

Windows Vista satıla başladı, Tatar ölgese cäygä kötelä


Sanaq programnarı dönyasında äydäp baruçı Microsoft şirkäte sişämbedä üzeneñ küptän kötelgän Vista sistemın satuğa çığardı. Tantana çaraları dönyanıñ törle illärendä ütte. Microsoft wäkilläre bu yaña sistemğa zur ömetlär bağlıy.

Vista sistemı urnaştırılğan sanaqlar eşkä cigelgändä menä şundıy tawış çığaraçaq. Bu tawışnıñ moñarçı äle yañğırağanı yuq ide. Sişämbe könne anı meñlägän qullanuçı işette. Vista dönyanıñ 70läp ilendä satıla başladı.

Bu waqiğa uñayınnan New York, Londonda zur tamaşalar ütte. New Yorkta ütkän çarada Microsoftqa nigez saluçı Bill Gates Vistanı 12 yıl elek bar dönyanı yawlap alğan Windows 95 belän çağıştırdı:

"Bar dönya digitalläşä, bu yaña sistem keşelärgä icat itergä, üzlärenä yaña programnar tözergä mömkinlek biräçäk. Windows 95 ul çornıñ açqıçı bulsa, Vista bezneñ çornıñ açqıçı bulaçaq" dide Bill Gates.

Dönyadağı sanaqlarnıñ 95%-ında Microsoftnıñ Windows sistemnarı urnaşqan. 2001 yılda çığarılğan Windows XP küp tänqit tudırğan ide. Xatalarnı qabatlamas öçen, Microsoft yaña sistemın kamilräk itergä tırıştı, bäyän itü waqıtı berniçä tapqır kiçekterelde. 5 yıl waqıt häm $6 milliard aqça sarıf itelde. Microsoftçılar äytüençä, Vista küpkä iminräk häm ışanıçlıraq bulaçaq.

Şulay da, Vistanı satu urınnarında bügen zur çiratlar kürenmäde. Säbäpneñ berse – anı här sanaqqa quyıp bulmıy:

"Anıñ tışqı qıyäfäte bik matur. Ör-yaña sanaqlarda ul bälki yaxşı eşlär dä. Läkin 2 yıl iske sanaqlarda ul bik aqrın eşlärgä mömkin" dide Envisioneering törkeme citäkçese Richard Doherty.

Bügenge sanaqlarnıñ ni barı 15%-tınıñ ğına Vista öçen citärlek yegärlege bar. Şuña küräder küplär, anı alırğa aşıqmıy. Östäwenä bäyäse dä şaqtıy yuğarı – şäkelenä qarap $100 belän $400 arasında. Zur çiratlar bulmawnıñ tağın ber säbäbe – Vistanı internetta da satıp alıp bula.

Mäğlüm bulğança, Tatarstan xökümäte belän Microsoft arasındağı kileşü nigezendä Windows sistemnarınıñ tatar ölgeläre eşlänä. XP digäne inde ğämäldä, xäzer Vistanı äzerläw bara. Bu eşneñ niçek baruı turında bez Vistanı tatarlaştıru törkeme wäkile, Qazan universitetı xezmätkäre Rinat Ğilmullinnan beleştek:

"Vista sistemın tärcemä itü eşe inde betep kilä. Annarı anı sınarğa kiräk bulaçaq, bu sınaw eşlärenä 1-2 ay bireläçäk. Vistadan qala bit äle Office programın da tatarlaştıru qaralğan. Bezneñ taraftan eşlär şul 1-2 ayda beter, dip uylıybız. Tulısınça anıñ äzerlegen Microsoft üze iğlan itergä tieş bulaçaq. Vistanıñ tatarlaştırılğan ölgese şul cäy başlarına kötergä kiräk" dide Rinat Ğilmullin.

Ul arada Vistanıñ şuşı kötep alınğan tuğan köne bäyräm itelgän arada, Qıtay uramnarında anıñ ğäyre räsmi ölgeläre päyda bulğan. Kilgän xäbärlärgä qarağanda, anda Vistanıñ yalğan, yağni pirat ölgelären ni barı 1 dollarğa alıp bula.

Ali Ğilmi
XS
SM
MD
LG