Accessibility links

пәнҗешәмбе, 8 декабрь 2016, Казан вакыты 14:55

Kuba citäkçese TVda päyda buldı, Castronıñ xäle yaxşırğan kebek


Awıru xäldä bulğan Kuba citäkçese Fidel Castro soñğı 3 ayda berençe tapqır televideniedä päyda buldı. Sişämbedä Kubanıñ däwlät televideniese anıñ Venezuela prezidentı Hugo Chavez belän bulğan oçraşuın kürsätte. Eçäk awıruınnan däwalanıp yatqan 80 yäşlek Castro, bu yazmada, elekkeläre belän çağıştırğanda, yaxşıraq kürende.

Sişämbedä Kuba xalqı soñğı 3 ayda berençe tapqır üzeneñ böyek yulbaşçısın kürü bäxetenä ireşte. Qısqa waqıtqa ğına, televideniedä genä bulsa da... Xisle itep töşerelgän 10 minutlıq video yazmada Fidel Castro Venezuela prezidentı Hugo Chavez belän oçraşa. Castronıñ qıyäfäte şaqtıy yaxşı, üzeneñ xälen ul "ömetsez tügel" dip bäyäli. Chavez aña sawlıq teli. Latin Amerika serialların xäterlätkän gitar muzıkası uynap tora.

"Bu minem genä sälämem tügel, millionlağan keşe siña sawılq teli. Bez sineñ belän soqlanabız, Fidel, sine yaratabız, sin bezgä kiräk, bez sineñ yuldan baraçaqbız" di Hugo Chavez.

Däwlät televideniese, yazma 27 Ğinwarda Havanada töşerelgän di, gärçä monı bäysez çığanaqtan raslap bulmıy. Şulay da, Castronıñ 27 Ğinwarda dönya kürgän gäzit uqığanı kürsätelä.

Castro ayağında, şaqtıy xäräkätçän, ämmä tele beraz körmäklänä. "Bez ciñäbez. Watan. Sotsializm. Yä ülem" digän Kuba inqilabı şiğären äytkändä, soñğı süzen Chavez östäp quyarğa mäcbür.

6 ay elek eçäk operatsiäse kiçergännän soñ Castro cämäğätçelek küzennän yuqqa çıqtı. Elegräk kürsätelgän yazmalarda ul şaqtıy yabıqqan, zäğif xäldä ide.

Yaña yazma televideniedä qabatlap kürsätelde. Havana uramında Miledis isemle yäş xanım, anıñ xäle yaxşıra, xäzer irkenräk sulıy alabız, bez alğa barabız, dip quana.

26 Yüldä Castro üzeneñ wäkäläten 75 yäşlek enese, Saqlanu ministrı Raul Castroğa tapşırdı. Şunnan birle anıñ xalıq aldına çıqqanı yuq. Küptän tügel ber İspan gäzite Castro bik awır xäldä dip yazıp çıqtı. Televideniedä kürsätelgän soñğı yazma Castronıñ sälämätlege tiräsendäge ğäybätlärne yuqqa çığarunı maqsat itep quyğan bulsa kiräk.

Ali Ğilmi
XS
SM
MD
LG