Accessibility links

җомга, 9 декабрь 2016, Казан вакыты 01:00

Omski merı tatar cämäğätçelege belän oçraşırmı


Bilgele bulğança, 11 martta Rusiäneñ 14 töbägendä, şul isäptän Omski ölkäsendä dä saylawlar bulaçaq. Bu waqiğağa äle aydan artıq waqıt bulsa da nämzätlär belän oçraşular inde başlandı diärgä mömkin. Omskida andıy oçraşularnıñ berse sişämbe könne “Sovremennik” mädäniät sarayında ütte. Anda şähärdä eşläp kilüçe milli-mädäni oyışmalar citäkçeläre häm aktivistları çaqırıdı. Ä nämzätlär oçraşuda ikäw buldı. Şähär başlığı Viktor Şreyder häm 72 sanlı mäktäp direktorı Raisa Kirbetnevсa. Döres, bu oçraşu turıdan-turı saylaw aldı çarası dip iğlan itelmäde häm kem öçender tawış birergä ügetläw bulmadı, barı tik alda äytep ütelgän şäxeslärneñ Qanunnar çığaru cıyılışına häm Şähär şurasına deputatlıqqa däğwä itüläre belderelde. Ä oçraşu barışında şähär başlığı Viktor Şreyder milli-mädäni oyışmalar citäkçeläre häm aktivistları tarafınnan birelgän küp sanlı sorawlarğa cawap birde. Sorawlar asılda kommunal toraq xucalığı, eşsezlek, narkomançılıq, meditsina xezmäte kürsätüdä bulğan häm başqa şundıy problemalarğa qağıldı. Milli problemalarğa qağılğan sorawlar quyılmadı diärlek. Barı tik çegän häwäskär kollektivı citäkçese mädäniät departamentı citäkçese belän oçraşa almawına häm repetitsiälär ütkärergä urın birelmäwenä zarlandı. Ä tatar möxtäriäte citäkçese şulay uq, forsattan faydalanıp, mernı 17 fevral'dä tatar cämäğätçelege belän oçraşuğa çaqırdı. Viktor Şreyder barlıq sorawlarnı uñay xäl itärgä wäğdä birde.

Oçraşu tämämlanğannan soñ min küptörle millät balaları uqığan mäktäptä eşläwçe Raisa Kirpetnevağa, tuğan tel uqıtu buyınça mäktäplärdä mömkinleklär barmı digän soraw yulladım. Ul, “Bernindi problema yuq, balanıñ tel öyränergä teläge häm saylap alu mömkinlege bulırğa tieş, “- dide.

Şul uq waqıtta ul, şähärneñ 14-nçe mäktäbendä, tel öyränergä teläwçe balalar häm öyrätergä teläwçe uqıtuçı bulğanda da, fakul'tativ açarğa röxsät birelmäde digängä, direktor xanım, “Mäktäpneñ aqçası bulmağandır”, dip cawap birde.

Rozaliä Sayganova, Omski

XS
SM
MD
LG