Accessibility links

шимбә, 3 декабрь 2016, Казан вакыты 03:33

Telefon söyläşülärenä tüläw arta


Pänceşämbedän başlap respublikada ğına tügel, ä böten Rusiä buylap telefon abunäçelären ällä ni küñelle bulmağan yañalıq kötä. 1 fevral’dän telefon belän qullanu öçen bäyälär arta. Monısına ğına xalıq inde küptän küngän, ällä ni iğtibar da itmägän bulırlar ide bälki. Läkin östäwenä äle yaña tariflar da kertelä äle. Menä şul yaña tüläw sistemaların kertü xalıqnıñ başın butadı. Küplär, fevral’ citte, niçek tülärgä, nindi tarifnı saylarğa, bu xaqta kemgä häm niçek xäbär itärgä kiräk ikän dip aptırap utıra xäzer. Mäğlümätlär çaralarında da bu xaqta ällä ni añlatıp äytüçe yuq. Yaña tüläw sistemasın kertüneñ üzençälege şunda, xäzer söyläşsäñ dä, söyläşmäsäñ dä abunä tüläwen barıber alaçaqlar. 1 fevral’dän kertelä torğan yaña tüläw sistemasında barlığı 3 tör tarif qaralğan. Berençese buyınça telefon iäse 125 sum abunä tüläwen häm ay däwamında söyläşkän minut xisabın tüli. İkençe tarifta 290 sumnı çığarıp salıp, telägän xätle söyläşü mömkinlege qaralğan. Öçençesendä isä 210 sum tülärgä, monıñ öçen abunäçegä ayına 380 minut söyläşü xoquqı birelä, şunnan artqanın inde ayırım tülärgä turı kiläçäk. Telefonnan söyläşüne minutlap xisaplaw mömkinlege bulmağan oçraqta ayına awıl cirlärendä 180 sum, ä şähärlärdä 210 sum tüläw qaralğan. Älege bäyälär tatarstan öçen. Respublikanıñ Elemtä ministrlığı mäğlümätlärenä qarağanda, bezdä alar başqa küp kenä Rusiä töbäkläre belän çağıştırğanda arzanraq ikän.

Ägär dä sez inde üzegezgä qulay tarifnı saylağansız ikän, bu oçraqta nişlärgä? Älege sorawğa cawapnı bezgä respublikanıñ Elemtä ministrı yärdämçese İlfir Yaqupov birde.

Sez üzegez kileşü tözegän operatorlarğa barıp, yaña kileşü yasarğa tieşsez. Läkin ällä ni aşığırğa kiräkmi, monı ber ay däwamında eşlärgä bula. Minemçä, operatorlar klientların yuğaltmas öçen üzläre sezneñ isegezgä töşeräçäk bu xaqta. Annarı, här kompaniäneñ dä şuşı mäs’älälärne xäl itärgä yärdäm itüçe qaynar telefon liniäläre eşli

Şulay itep, xäzer keşelärgä kileşü tözegän kompaniägä barıp, üzeneñ nindi tarifnı saylawı xaqında ğariza yazarğa kiräk. Läkin sez tarifığıznı üzgärtergä telämisez ikän, berqayda da barıp yörergä kiräk. Bu oçraqta sez elek qullanıla torğan tarif buyınça tüläyäçäksez. Alda äytelgänçä, yaña tariflarğa küçüdäge añlaşılmawçanlıqlarnı çişär öçen här kompaniäneñ qaynar telefon liniäläre eşli. Anda sorawları buluçılarğa yärdäm itäçäklär. Elemtä ministrlığınıñ da şundıy yärdäm telefon nomerı eşli. Anıñ nomerı – 292 40 14.

Gölnaz İlgizär

XS
SM
MD
LG