Accessibility links

Кайнар хәбәр

“Härkem alırlıq” toraqnı niçek tözergä?


Et xuca süzennän çıqmıy dilär bit. Prezident Mintimer Şäymiev äytkän süzlär yış qına qanatlı ğibärälärgä äylänä. Bıltır, niçekter “Bez buldırabız” digäç, yıl däwamında, küp kenä citäkçelär bu süzne bik yış qabatladı.

Küptän tügel Qazanda uzğan Rusiä däwlät şurası utırışında, Tatarstan prezidentınıñ, “Mı doljnı sdelat' cil'ye dostupnım”,“Bez toraqnı här keşe ala alırlıq tiergä tieş” digän süzläre dä küplärgä oşağan küräsen. Kvadrat metr xaqı urtaça 25-30 meñnän kimemi, ä söyläşülär, ığı-zığı däwam itä. Sotsial' ipotekağa da yaqın kilä torğan tügel. Ul arada kemder bu xäldän faydalanıp, tabış almaqçı bula.

Qazan könnän-kön yaqtıra bara. Layıştan kergändä, “Solneçnıy-Qoyaşlı” bistäse, Piträçtän barğanda “Svetlıy-Yaqtı” şähärçege tözelep kilä. Hämmäse yaqtı, matur tormış, ä iñ möhime arzan toraq wäğdä itä.

Tatar “Rublevqa”sı dip sanalğan Salmaç bistäsennän 3 kilometr qırdan uzğaç, Küyuki digän ber yämsez genä awılğa barıp keräseñ. Bügenge köndä Biredä, 500 gektar cirdä, Mäskäwneñ “ANTEY” firması, arzan qottedclar tözep, xalıq öçen cännät eşlämäkçe bula. Maqsat – bu cirdä 4500 yort salıp, şähärçek buldıru. Bu eş älbättä Tatarstan prezidentınıñ “Härkem dä ala alırlıq toraq” programması buyınça eşlänä. ANTEY firması general' direktorı Vladimir Ostaşqo bu programmağa qarata mönäsäbäten tıñlap kitik.

Mintimer Şäripoviçnıñ programması ul añlayışlı häm waqıtlı. Minemçä Tatarstan prezidentı, Rusiä külämendä tuğan toraq mä’säläsen añlıy. 19 ğinwarda uzğan däwlät şurası utırışında da Tatarstan prezidentı tarafınnan sallı fikerlär yañğıradı. Min alarnıñ barısı belän dä kileşäm. Bıltır bezneñ oyışma, prezidentqa, Qazan çitendä şähärçek tözergä digän täqdim belän çıqqan ide. Mintimer Şäripoviç berençe bulıp uñay cawap birde. Näticädä bez awıl xucalığı äyläneşennän cirne 2 eçendä satıp aldıq.

“Svetlıy” bistäsendä yortlar berniçä törle. Ekonom, Biznes, Elita törendäge yortlar bar. Keşelärne iñ qızıqtırğanı bu yortlarnıñ bäyäläre. Küptän tügel respublika mäğlümat çaralarında mondıy yortlarnıñ kvadrat metrı 500 dollar yäğni 13 meñ Sum toraçaq dip yazğan ide. Küpme tırışsañ da, şähärdä bu bäyägä fatir tabuı, mömkin tügel, şähär çitendäge qottedclarnı bigräktä. Bäyäneñ arzan bulunıñ sәbäbe nidä. Bu sorawnı bez ANTEY firması general' direktorı Vladimir Ostaşqoğa yulladıq.

Bez täqdim itkän tözeleş programması iqtisadi yaqtan şulqädär uñay, xätta bez älege yortlarnıñ kvadrat metrın 12 meñnän sata alabız. Tözegen waqıtnı isä bez kvadrat metrğa 8 tiräse aqça totabız. 12 meñ bu äle bezneñ soñğı buya tügel. Yortlarnı täqdim itkäç, alarğa qarata, xalıq fikeren añlağaç, kvadrat metrlarğa bäye bilgelänäçäk. Älbättä ul 12 meñnän yuğarıraq bulsaq.

Kvadrat metrnıñ üz bäyäse, yäğni tözelü xaqı, nibarı 9 meñ sum tiräse. Yortlarnıñ zurlığı 180 – 240 kvadrat metr. Urtaça bäya kvadrat metrı 18 meñnän alsaq a, yort bäyäse 3 million yarımğa basa. Bu bäyägä menä digän yort alıp, şunda räxätlänep yäşim digän keşe yalğışa. Çönki alarnıñ astağı qat belän mansard öleşe axırğaça yasalıp betmägän. Monı yort xucası tora bara üze tözergä tieş. Annan soñ bezneñ keşegä, alğan-alğan, munçası da, ğaracı da bulsın, tana da bulsın, buaz da bulan. Tik yort proyektında mondıy östämä tözeleşlär qaralmağan. Telägän keşe üze sala, alay da bilgele ber şartlarda ğına. Fikerne Vladimir Ostaşqo däwam itä

Bez täqdim itä torğan yort mäydanında munça ğarac kebek östämä tözelmälär qaralmağan. Telägän keşe älbättä alarnı tözi ala. Läkin monda bilgele ber çikläwlär bar. Bu energiä häm cir belän bäyle. Yort xucaları östämä äyberlär tözegändä kübräk energiä häm şähärçekneñ infrastrukturası bozılmasın öçen arxitektorlar röxsäten alırğa tieş.

Älege yortlarnı alırğa telägän keşelär, aldan uq tüläp quya almıy. Yortlar fäqät, 1 iyüldä kiñ cämäğätçelek xozurına 27 yort kürsätelgäç kenä satıla başlayaçaq. Alar törle yul belän satılaçaq, şul isäptän ipoteqa, kredit räweşendä dä. Vladimir äfände äytüençä inde bügen alar berniçä bank belän eşli. Barlığı isä bıyıl 200га yaqın yort salırğa niätlänä. Älege yortlar satılaçağında “ANTEY” citäkçelege şiklänmi. Bu xaqta ANTEY firması general' direktorı Vladimir Ostaşqo söyli.

Bügenge köndä bezneñ şundıy uq yortlar Mäskäw astında tözelä. Anda bu şähärçekne bez “Polyanqa” dip atadıq. Şunı äytergä kiräk, anda bu yortlarnı bik teläp alalar. Arzan bulğanğa ğına tügel, bu yortlar dörestän dä yäşäw öçen bik uñaylı. Kem teli alarnı üzençä üzgärtä. Läkin bez täqdim itkän variantta da alar yaxşı yortlar.

Ber yılda 200 yort kütärü ciñel tügel.c Eş barışında küp kenä çişelmägän mäs'älälär kilep tua di Vladimir äfände. Şundıylarnıñ berse eşçelär mä’säläse.

Älbättä eşçelär mä’säläse bar. Bez yaña texnologiälär buyınça eşlibez, keşelärne eşlätkänçe, alarnı öyrätergä turı kilä. Küp eşçelär awılda, rayonnardan kilde. Ämma kvalifikatsiäle eşçelär barıber citmi. Şunlıqtan bügen kompaniä matdi yaqtan berniqädär yuğaltular kiçerä.

Älege yortlar turında kübräk mäğlümat belergä telägännär, 1 marttan eşli başlayaçaq, “Svetlıy” şähärçegeneñ säxifäsenä kerep qarıy ala. Ä älegä keçkenä genä, tınıç qına Küyuki awılında kön-tön görläp tözeleş eşläre alıp barıla. Mäskäwlelär, sayısqan oyasın, tüti qoş çitlege bäyäsennän satıp, tuzğan toraqta yäşäp intekkän qazanlılarnı bäxetle itmäkçe bula.

Ğädel Galämetdinov.

XS
SM
MD
LG