Accessibility links

Кайнар хәбәр

Başqortlar baş kütärä


Comğa könne Başqortstandağı başqort milli oyışmaları tağın ber tapqır Mäskäw Kremlenä, federal' üzäkkä yodrıq kürsätte. Başqort milli säyäsäten ütkärüdä başlap yörüçelär bulğan “Ural” başqort xalıq üzäge, Başqort yäşläre berlege häm “Aq tirmä” başqort milli-mädäni üzäge Rusiä Prezidentı Vladimir Putinğa açıq xat qabul itte häm tarattı. Putin äfände isemenä yazılsa da, andağı taläplär häm täqdimnär küpçelektä Başqortstan citäkçelegenä yünälderelgän. İl Prezidentına yazılğan xatta başqort milli oyışmaları Başqortstan citäkçelegenä Rusiä federal' byudjetına barlıq tör salımnarnı tüläwne kiçekmästän tuqtatunı taläp itä. Monı başqort milli xäräkäte wäkilläre Rusiä citäkçeläreneñ Başqortstanğa aldan kileşmiçä Salım idaräse başlığı itep Qazannan Aynur Äydeldinovnı kiterep quyu belän bäyläp añlata.

“Bez moña qadär dä federal' byudjetqa 70 protsentqa yaqın salımnarnı ozata idek, xäzer bötenläy dä soñğısın tartıp alaçaqlar Başqortstannan”, - dip äytelä ul Xatta.

Elegräk tä xäbär itelüençä, Ufada 29 ğinwar könne Rusiä xakimiätläreneñ säyäsätenä qarşı rizasızlıq çaraları bulıp ütkän ide inde. Başqalanıñ ike urınında “Federativ Rusiä öçen” isemle xäräkät oyıştırğan qarşılıq piketlarında älläni küp keşe qatnaşmasa da, alarda yañğırağan çaqırular Mäskäw Kremlenä şaqtıy kisken kisätülärne üz eçenä alğan ide.

İke piketnı da, nigezdä, “Federativ Rusiä öçen” xäräkäteneñ nigezen täşkil itüçe başqort milli oyışmaları wäkilläre oyıştırdı.

Ufadı ike piketnıñ berse Fedaral' Salım xezmäteneñ Başqortstan idäräse binası qarşında ütte. Andağı ber çaqıruda yañaraq şuşı idäräneñ başlığı itep täğäyenlängän Aynur Äydeldinovnı Qazanğa qaytıp kitärgä çaqırğan yazu da bar ide. Elegräk xäbär itelüençä, Aynur äfände bu urınğa Tatarstandağı yuğarı wazıyfasınnan alıp küçerelgän ide. Yuğisä, Aynur Äydeldinov bu wazıyfağa üz beldege belän genä kilep utırmağan da inde. Mäskäwdän quşqannar ikän – kilgän inde.

Annan qayber säyäsätçelär fikerençä, başqort milli oyışmaları wäkillärenä berençe çiratta salım idäräse citäkçese itep Qazannan kilgän tatar keşeseneñ quyıluı oşamadı. “Ägär dä Äydeldinov äfände urınına Ryazan yä Kostroma ölkäsennän berär rus keşese kiterep quyılsa, başqort millätçeläre moña iğtibar da itmäs ide, bälki, - di respublikadağı etnologiä ğalime İldar Gabdrafıykov. – Annan monıñ ikençe säbäbe dä bar – respublika xakimiätläre öçen üzlärenä buysınuçı Salım idäräse başlığı qulayraq ide. Ni öçen digändä, alarnıñ qubızına biemägän keşe respublikadağı neft' şirkätlärenä bäyle urlaşularnı açıqlarğa mömkin”.

İldar äfände fikerençä, başqort milli oyışmalarınıñ Putin isemenä Xat yazuı artında da, Ufada piketlar oyıştıruı artında da Başqortstannıñ räsmi citäkçelege tora. “Şulay bulmasa, räsmi televidenie häm radio kanallarında alarnıñ çığışların yaqtırtu öçen şul qädär küp waqıt bülener idemeni”, - di İldar Gabdrafıykov.

XS
SM
MD
LG