Accessibility links

сишәмбе, 6 декабрь 2016, Казан вакыты 13:18

Ufada açlıq iğlan ittelär


Ufada tatar gimnaziäse öçen dip tözelüçe binanı cimerä başlawları xaqında uzğan programmabızda xäbär itkän idek inde.

Respublika xakimiätläre tatar eşquarları Ufada tözetüçe Ğabdulla Tuqay isemendäge tatar gimnaziäse binasın cimerü omtılışların moñarçı da yasağan ide. Ämma, tatar cämäğätçelek oyışmaları häm Başqortstan Berläşkän oppozitsiäsenä kerüçe başqa oyışmalar häm xäräkätlär wäkilläre qarşılıq kürsätkäç, aña nıqlap totınırğa baznat itmädelär. Biredäge xällär 1 fevral'dä kisken üzgärde. Çönki şuşı könneñ irtäsendä, kötmägändä-uylamağanda, distälärçä militsiä xezmätkäre häm mäxkämä pristavları ozatuında biregä awır texnika kilde. Zur qapqanı töbennän suırıp çığarıp eçkä – tatar gimnaziäse binası yanına ütte alar. Bik irtä bulu säbäple, äle biregä cämäğätçelek oyışmaları äğzaları kilep tä ölgermägän ide. Gimnaziäne cimerü öçen kilgän eşçelär törkeme biredä tirä-yun'däge qarnı çistartu eşenä kereşte. Annan soñ binanı cimerü eşlärenä kereşäçäklären äytte.

Kilep tuğan kierenke şartlarda tatar gimnaziäse binasın saqlap qalu öçen köräşüçelär aşığıç kiñäşmä ütkärergä buldı. Atnakiç kiçendä uzğan ul söyläşügä Başqortstannıñ Berläşkän oppozitsiäsenä kerüçe baytaq oyışmalar häm xäräkätlär citäkçeläre dä kilgän ide. Älege cıyınnı oppozitsiä başlığı häm Başqortstan Tatar milli-mädäni moxtariäte räise Ramil Bignov açtı häm alıp bardı. Üzeneñ çığışında ul tatar gimnaziäse binasın saqlap qalu öçen köräşneñ qatğıy yulları ğına qala dip belderde ul. Şuşı yullar turında üzeneñ çığışında Ramil Bignovnıñ urınbasarı, sütelä başlağan tatar gimnaziäseneñ xucası häm ixtimal direktorı Mäcit Xucin täfsilläbräk söyläde. Anıñ süzlärençä, xakimiätlärneñ şuşı ğauğağa iğtibarın cälep itüneñ soñğı çaraları qala. Şularnıñ berençese itep Mäcit äfände açlıq iğlan itüne atadı. “Berençe öç keşe şuşı comğadan başlap açlıq iğlan itä – berse min , ikençese Ramil Bignov häm öçençe keşe Başqortstandağı urıslarnıñ “Rus” ictimaği oyışması idäräse äğzası Sergey Kozlov”, - di Mäcit Xucin. Anıñ süzlärençä, açlıq iğlan itep kenä Başqortstan xakimiätlärenä ällä ni yoğıntı häm tä'sir yasap bulmayaçaq. “Şuña kürä dä bez açlıq iğlan itüdän tış başqa adımnar turında da uylandıq häm bezgä teläktäşlek kürsätüçe başqa oyışmalar häm xäräkätlär wäkilläre belän berlektä ul adımnarğa da barırğa kileştek. Kiläse atnadan ul çaralarğa kereşü dä qaralğan”, - di Mäcit äfände.

Atnakiç könne Ufada tatar gimnaziäse binası tiräsendäge şaw-şuğa qağılışlı tağın ber çara – Başqortstan Baş mäxkämä pristavı idäräsendä jurnalistlar öçen matbuğat oçraşuı bulıp ütte. Anda bu ğauğadağı ike taraf – ber yaqtan gimnaziä xucası sanalğan professor Mäcit Xucin, ä räsmi xakimiätlär tarafınnan Ufa şähäre xakimiäte başlığınıñ tözeleş mäsälälärendäge urınbasarı Ramil Xälimov ta çaqırıldı. Biredä ike taraf ta üz qaraşınıñ döreslegen isbat itärgä tırıştı. Ä Başqortstannıñ Baş mäxkämä pristavı Zarif Bayguskarov bu tartqalaşta bötenläy dä çit pozitsiäne aldı. “Bez barı tik üzebezgä yöklätelgän eşne genä başqarabız”, - dide ul.

Başqortstannıñ baş mäxkämä pristavı Zarif Bayguskarov fikerençä, tatar gimnaziäse öçen täğäyenlängän binanı sütü turında färman bar, mäxkämä qararı bar, şulay bulğaç, monda bernindi däğwälar da urınsız, di ul.

Ufa şähäre xakimiäte başlığı urınbasarı Ramil Xälimov ta tatar gimnaziäse binasın tözüneñ qanunsız bulu xaqında küptän kisätülär yasalğanlığı häm anı cimerergä quşılğanlığı xaqında äytte. “Binanıñ xucaları anı üz ixtıärı belän cimermägäç, bez anı xäzer mäcbüriläp sütteräçäkbez”, - dide ul.

Gimnaziä xucası, professor Mäcit Xucin isä üz çığışın tatar gimnaziäse binası tiräsendäge xällärneñ kilep çığuı barı tik säyäsi häm milli säbäplärdän genä, dip yomğaqladı.

Ufa tatar gimnaziäse tiräsendäge xällär comğa könne dä kierenke bulıp qaldı. İrtänge säğätlärdä ük biregä avtobuslarğa töyelgän militsiä xezmätkärläre häm OMON, yäğni maxsus täğäyenläneştäge otryadlar xezmätkärläre, şulay uq mäxkämä pristavlarınıñ iminlek saqlaw xezmätkärläre kiterelde. Awır texnika eşçeläre cimerü eşen däwam itte.

Töş waqıtında isä biredä tatar oyışmaları häm Başqortstan Berläşkän oppozitsiäsenä kerüçe oyışmalar citäkçeläre jurnalistlar öçen matbuğat oçraşuı oyıştırdı. Anda, nigezdä, federal' ğämmäwi mäğlümat çaraları wäkilläre kilgän ide. Oçraşunı Başqortstan Berläşkän oppozitsiäse citäkçese, Tatar milli-mädäni moxtariäte räise Ramil Bignov açtı häm alıp bardı. İñ täwdä ul jurnalistlarğa cäncalğa säbäp bulğan binanıñ tözelü tarixı häm anı yaqlaw öçen yasalğan adımnar turında söyläde. Xakimiätlär belän bu mäsäläne tınıç xäl itü öçen alıp barılğan söyläşülär, möräcäğätlär tekstların da, başqa xoquq dokumentların da kürsätte Ramil äfände. Bügen ul gimnaziäne cimerügä qarşılıq yözennän üzeneñ häm tağın ike keşeneñ açlıq iğlan itüen rasladı. Şulay da Ufa xakimiäte belän mirovoy kileşügä kilü ömeten dä özmäwen äytte Ramil Bignov.

Şulay itep Ufada comğa könne tatar gimnaziäsen cimerügä qarşılıq yözennän öç keşe açlıq iğlan itte. Aldağı könnärdä bu çarağa tağın da törle cämäğätçelek oyışmaları wäkilläre quşılaçağı äytelde. Ber ük waqıtta kiläse atnada oyıştırılaçaq piketlarğa häm 13 fevral'dä uzaçaq mitingqa da äzerlek mäsäläläre tikşerelä başlıy.

Fänis Fätxi, Ufa

XS
SM
MD
LG